დღეს, 15 მაისს, ბათუმის საჯარო სკოლების მოსწავლეები საპროტესტო აქციას მართავენ რუსული კანონის წინააღმდეგ.
სკოლის მოსწავლეები ამ წუთებში იკრიბებიან ცენტრალური პარკის შესასვლელთან. მათი თქმით საპროტესტო აქცია დღის 2 საათისთვის დაიწყება.
„მეექვსე და მეათე სკოლა ვართ ჯერ გამოსული. ვაპროტესტებთ რუსულ კანონს, არ მოგვწონს ის რაც ხდება საქართველოში. მთავრობა და პოლიცია უნდა იყოს ხალხის მხარეს, ჩვენ უნდა გვიცავდეს და არა ძალადობდეს ჩვენზე და უკანონოდ გვიჭერდნენ. დემოკრატიულ ქვეყნებში ასეა – ხალხის აზრს და ძალას წარმოადგენს მთავრობა, ჩვენ ვართ რეალურად ამ ქვეყნის მმართველები და ჩვენ უნდა წარმოგვადგენდეს მთავრობა.
ამდენი ხალხი, მოსახლეობის უმრავლესობა გამოსულია, ამბობს რომ ეს კანონი არ უნდა. მთავრობამ ძალადობით და უკანონობით მაინც გაიტანა ეს კანონი. თან პარალელურ რეჟიმში თვალებში ნაცარს გვაყრიან,“ – უთხრა „ბათუმელებს“ ერთ-ერთი სკოლის მოსწავლემ.
დღეს ბათუმში კიდევ ერთი აქციაა დაგეგმილი. საღამოს 19:00 საათზე ბათუმის შოთა რუსთაველის უნივერსიტეტის წინ სტუდენტები კიდევ ერთხელ გააპროტესტებენ რუსული კანონის მიღებას.
