Batumelebi | სად არის აკრძალული კოცნა – უცნაური ფრანგული კანონები სად არის აკრძალული კოცნა – უცნაური ფრანგული კანონები – Batumelebi
ნეტგაზეთი • RU

სად არის აკრძალული კოცნა – უცნაური ფრანგული კანონები

სახალისო კანონები დღემდე შემორჩა ისტორიული წარსულიდან და აქამდე ყველას ევალება მისი შესრულება. წარმოგიდგენიათ, რომ სადმე ჩახუტება და კოცნაა აკრძალული?

ესეც რამდენიმე აბსურდული კანონი საფრანგეთის ძველი და ახალი, მოქმედი კანონდებლობიდან, რომელიც ყველას გაახალისებს.

ჩახუტების აკრძალვა

ფრანგული კანონმდებლობის მიხედვით, აკრძალულია ჩახუტება და კოცნა რკინიგზისა და ზოგადად, სატრანსპორტო სადგურებში. აკრძალვა იმ ეპოქიდან მოდის, როცა შეყვარებულები ერთმანეთს ხანგრძლივად ემშვიდობებოდნენ გამგზავრების წინ, რაც მნიშვნელოვნად აფერხებდა მატარებლის ადგილიდან დაძვრას.

ფოტო: pariszigzag

ფრანგული მუსიკის მონოპოლია რადიოეთერში

ვისაც საფრანგეთში უმოგზაურია, უმრავლესობა გეტყვით, რომ ფრანგებს საკუთარი ენისადმი განსაკუთრებული დამოკიდებულება აქვთ და მაინცადამაინც არ მოსწონთ, როცა ტურისტები რაიმეს ინგლისურად ეკითხებიან. თავიდან აუცილებლად გკითხავენ, საუბრობთ თუ არა ფრანგულად. თუ მხოლოდ ინგლისური გესმით, გიპასუხებენ ამ ენაზე, ოღონდ ამას დიდი სიამოვნებით არ აკეთებენ. როგორც ჩანს, იგივე დამოკიდებულება ვრცელდება ფრანგულ მუსიკაზეც, რადგან კანონის მიხედვით, დილის 8-დან საღამოს 20 საათამდე ფრანგულ რადიოებში გაშვებული მუსიკის 70% ფრანგული უნდა იყოს. საინტერესოა, რამდენად შეესაბამება ეს კანონი რადიოს თანამედროვე მსმენელების მოთხოვნებს.

განათებული ეიფელის კოშკი-კანონით დაცული ხელოვნების ნიმუში

აკრძალულია ღამით ეიფელის განათებული კოშკის გადაღება. კოშკი 20 000 ნათურით ნათდება და განათება ხელოვნების ნიმუშადაა მიჩნეული. როგორც ხელოვნების ყველა ნიმუში, ეიფელის კოშკის განათებასაც კანონი იცავს საავტორო უფლებების შესახებ. თუ უბრალოდ პირადი არქივისთვის იღებთ ფოტოს, კანონს არ არღვევთ, მაგრამ თუ განათებული ეიფელის კადრს კომერციული მიზნებისთვის გამოიყენებთ, კოშკის განათების ავტორს შეუძლია შეგედავოთ.

ფოტო: pariszigzag

თივის გროვა ყველა ფრანგულ ოჯახში

ფრანგულ კანონებში, მართალია სიმბოლურად, მაგრამ დღემდეა შემორჩენილი მონარქიისდროინდელი წესი: ყველა ფრანგულ ოჯახს ევალება შინ ჰქონდეს თივის გროვა იმ შემთხვევისთვის, თუკი მეფე ცხენით ჩამოივლის. ფრანგებს ეს სიმბოლური კანონი ხელს არაფერში უშლით, მაგრამ ერთ მშვენიერ დღეს რომ მონარქია აღდგეს, სახალისო იქნება, როგორ გამოკვებავენ მეფის ცხენებს ფრანგები მერვე, მეცხრე სართულებიდან თივის ბულულებით.

კანონი მიწისქვეშეთისა და ჰაერის მფლობელობაზე

1804 წლის ძველ კანონში მითითებული იყო, რომ თუ რომელიმე შენობის მფლობელი იყავით, გეკუთვნოდათ ასევე საკუთრების მიწისქვეშეთი და ცაც, შენობის თავზე. ეს კანონი რომ ახლაც არსებობდეს, საავიაციო კომპანიებს ვინ იცის რამდენი მესაკუთრისგან დასჭირდებოდათ ნებართვა მოქალაქეების პირად საკუთრებაში არსებული სივრცის გადასალახად.

ღორის ფრთხილად შესარჩევი სახელი

ღორს, რომელსაც ნაპოლეონი ჰქვია, ვერ ნახავთ ვერც ერთი ფრანგი გლეხის ოჯახში, რადგან საფრანგეთში იკრძალება იმპერატორის სახელი უწოდონ ცხოველს. გამორჩეულ კორსიკელს ფრანგები ამ ფორმითაც მიაგებენ დღემდე პატივს.

ფოტო: pariszigzag

გარდაცვლილი კანდიდატები საარჩევნო სიებში

ფრანგებს არჩევნებისას შეუძლიათ ხმა გარდაცვლილ კანდიდატს მისცენ. თუ კანდიდატი არჩევნების წინა დღეს ან უშუალოდ არჩევნების დღეს გარდაიცვლება, შეუძლებელია კანდიდატთა სიების ცვლილება, რომელიც წინასწარაა შინაგან საქმეთა მინისტრის მიერ დამტკიცებული და ხელმოწერილი. მსგავსი შემთხვევა ერთხელ უკვე იყო, როცა 2010 წლის რეგიონული არჩევნების დროს, შარანტ-მარიტიმში პარტია NPA-ს (Le Nouveau Parti anticapitaliste) კანდიდატი გარდაიცვალა არჩევნებამდე რამდენიმე დღით ადრე.

ღვინო, ლუდი და სიდრი – სამსახურში ნებადართული ალკოჰოლური სასმელების ჩამონათვალი

„არც ერთი ალკოჰოლური სასმელის მოხმარება არ არის ნებადართული სამუშაო ადგილზე გარდა ღვინის, ლუდისა და სიდრისა (მსუბუქი ღვინო ვაშლის არომატით)“ – ეს ამონარიდია ფრანგული საჯარო სამსახურების წესდებიდან. კანონი ფართო არჩევანს უტოვებს დასაქმებულს, როგორ გახალისდეს სამსახურში  შრომისუნარიანობის ასამაღლებლად: მსუბუქი ალკოჰოლით თუ ნება-ნება მირთმეული მუქი, შავი ღვინით.

წყარო: pariszigzag 

ნეტგაზეთის მასალების სხვა გამოცემებში გადაბეჭდვის წესი
ავტორი
თამარ ნერგაძე არის "ბათუმელების" რეპორტიორი 2017 წლის ოქტომბრიდან. ტელ.: 568 81 41 75 / E-mail.: tamarnergadze123@gmail.com