Batumelebi | მთავრობამ შეცდომა გაასწორა მთავრობამ შეცდომა გაასწორა – Batumelebi
RU | GE  

მთავრობამ შეცდომა გაასწორა

 

საქართველოს მთავრობამ სარეზერვო ფონდიდან აჭარის ავტონომიური რესპუბლიკისათვის თანხის გამოყოფის შესახებ 2015 წლის 5 თებერვლის №140 განკარგულებაში ცვლილება შეიტანა. ამ განკარგულებით აჭარის მთავრობას 4 მილიონი ლარი  მუსლიმთა სამმართველოსთვის ქონების შესაძენად გამოეყო.

განკარგულების თავდაპირველი ვარიანტით, აჭარის მთავრობას მუსლიმთა სამმართველოსთვის ქ. ბათუმში, ანგისის ქუჩა №39-სა და №41-ში მდებარე მიწის ნაკვეთები და მათზე მდებარე შენობა-ნაგებობები უნდა შეესყიდა.

ანგისის ქუჩა №39-ში მდებარე შენობის მეპატრონემ „ბათუმელებთან“ მაშინ აღნიშნა, რომ ქონებას არ ყიდდა. აჭარის მთავრობის წარმომადგენელმა, პარმენ ჯალაღონიამ, კი „ბათუმელებთან“ განმარტა, რომ ადგილი ჰქონდა ტექნიკურ შეცდომას: „მისამართები საქართველოს მთავრობას აღებული აქვს მუსლიმი მრევლის მიმართვიდან.  გუშინ მივწერეთ, რომ შეცდომაა, ზეგ გადის [საკითხი] სხდომაზე და შეიცვლება კოდები“.

საქართველოს მთავრობის 280-ე განკარგულებით შეცდომა გასწორდა და ტექსტი შემდეგნაირად ჩამოყალიბდა:

„სსიპ – სრულიად საქართველოს მუსლიმთა სამმართველოსათვის სარგებლობაში გადასაცემი ქონების (ქ. ბათუმში ანგისის დასახლებაში არსებული ორი უძრავი ნივთის – მიწის (უძრავი ქონების) საკადასტრო კოდები: 05.32.01.049 და 05.32.01.316) შეძენის მიზნით, საქართველოს ფინანსთა სამინისტრომ, ,,საქართველოს 2015 წლის სახელმწიფო ბიუჯეტის შესახებ“ საქართველოს კანონით განსაზღვრული საქართველოს მთავრობის სარეზერვო ფონდიდან, აჭარის ავტონომიურ რესპუბლიკას გამოუყოს 4 000 000 (ოთხი მილიონი) ლარი“.

05.32.01.049 – საკადასტრო კოდით არსებულ მიწის ნაკვეთზე მესაკუთრის შეცვლის მოთხოვნით საჯარო რეესტრში განცხადება აჭარის ავტონომიური რესპუბლიკის სახელით უკვე შეტანილია და საქმე წარმოებაშია. აღნიშნულ ნაკვეთზე დგას მრავალსართულიანი შენობა, რომელშიც ადრე „იტალიური სკოლა“ იყო.

შენობა რომელშიც /იტალიური სკოლა/ იყო

რაც შეეხება 05.32.01.316 – საკადასტრო კოდით არსებულ ნაკვეთს, აქ სასტუმრო „კრისტალია“ განთავსებული. შენობები ერთმანეთისგან რამდენიმე მეტრითაა დაშორებული.

სასტუმრო/კრისტალი/

ნეტგაზეთის მასალების სხვა გამოცემებში გადაბეჭდვის წესი
თედო ჯორბენაძე