Batumelebi | უფასო სასადილოთი მოსარგებლეთა რიცხვი ბათუმში 400-ით გაიზარდა უფასო სასადილოთი მოსარგებლეთა რიცხვი ბათუმში 400-ით გაიზარდა – Batumelebi
RU | GE  

უფასო სასადილოთი მოსარგებლეთა რიცხვი ბათუმში 400-ით გაიზარდა

 

ბორშჩი, სოსისი, წიწიბურა, პური და კომპოტი – დაახლოებით ასე გამოიყურება უფასო სადილის მენიუ ერთი დღისათვის. მენიუ ყოველ დღე იცვლება, ერთი ადამიანის გამოსაკვებად დღეში 1 ლარი და 80 თეთრია გათვალისწინებული.  უფასო სადილის მისაღებად ბათუმში მდებარე ხუთ სასადილოს ყოველდღიურად 3042 ადამიანი აკითხავს. აიპი „ბათუმის მუნიციპალური სასადილოს“ ხელმძღვანელის, ბადრი გოგიძის ინფორმაციით, 2015 წლიდან მუნიციპალური სასადილოთი მოსარგებელთა რიცხვი 400 ადამიანით გაიზარდა, ასამდე სოციალურად დაუცველი კი რიგს ელოდება.   

 ბატონო ბადრი, ლარის კურსის ცვლილებას ხომ არ გამოუწვევია რაიმე ტიპის ცვლილება პროგრამაში, იმავე პროდუქტებით მარაგდება სასადილო, რაც ინფლაციამდე იყო? 

 არავითარი ცვლილება არ არის. ჩვენ ტენდერის პირობებით ვაგრძელებთ მუშაობას. ლარის ცვალებადობა არ მოქმედებს არც მენიუზე და არც პროდუქციის შესყიდვაზე.

სოციალურ ქსელში გავრცელდა ინფორმაცია, რომ თითქოს პირველი მარტიდან ულუფის წონის ცვლილებაა მოსალოდნელი… 

მენიუ დამტკიცებულია ბათუმის საკრებულოს მიერ და მისი ცვლილება შეუძლებელია. პირიქით, იმაზე ვფიქრობთ, როგორმე გავზარდოთ წონა. ჩვენ გასული წლის ნოემბერში გამოვაცხადეთ ტენდერები პროდუქციის შესყიდვაზე, თანხა გაწერილია და ამის ცვლილება არ მოხდება. ეს მხოლოდ ფორს-მაჟორის შემთხვევაში შეიძლება მოხდეს, რისი საფუძველიც დღეს არ არსებობს.

პროგრამით მოსარგებლეთა რიცხვი თუ გაიზარდა და რამდენით?

 ბათუმში 5 300 ადამიანია, ვინც ამ პროგრამით უნდა სარგებლობდეს, მაგრამ ჯერჯერობით 3042 ადამიანს ვკვებავთ. პირველ კვარტალში ცვლილება არ იქნება და შემდეგ ვნახოთ. 

 ახალი წლიდან რამდენმა ადამიანმა მოგმართათ პროგრამაში ჩართვის თხოვნით?

ახალ წლამდე 400 განცხადება იყო შემოსული და ყველა დავამატეთ. ასამდე ადამიანი კიდევ ელოდება, მაგრამ მეტის დამატება ჯერ არ შეგვიძლია. 

რამდენია პროგრამის ბიუჯეტი მიმდინარე წელს?

ერთი მილიონ 780 ლარია მთლიანი ბიუჯეტი და ბათუმის მასშტაბით ხუთ მუნიციპალურ სასადილოს ვემსახურებით. 

უფასო სასადილო ბათუმში. ფოტო ბათუმელების არქივიდან

უფასო სადილით მოსახლეობის უზრუნველყოფის პროგრამა ბათუმში 2005 წლის მაისში ამოქმედდა და თავიდან ემსახურებოდა 200 ბენეფიციარს. 2006 წელს პროგრამა ემსახურებოდა 300 ბენეფიციარს, 2007 წელს – 750, 2008 წელს – 915, 2009 წელს – 1200, 2010 წელს – 1350, 2011 წელს – 1470 ბენეფიციარს.
2012 წელს დაემატა ორი სასადილო და მომსახურება გაეწია 2050 ბენეფიციარს, 2013 წელს – 2100, ხოლო 2014 წელს – 2644 ბენეფიციარს. უფასო მუნიციპალურ სასადილოებს 2014 წლის მარტიდან ა(ა)იპ ბათუმის მუნიციპალური სასადილო მართავს.

ნეტგაზეთის მასალების სხვა გამოცემებში გადაბეჭდვის წესი
ლელა დუმბაძე