მოსარჩელეს გასაჩივრებული აქვს რამდენიმე საკანონმდებლო ნორმა, რომელიც განსაზღვრავს პირადობის მოწმობის და ასევე პასპორტის ფორმის დამტკიცების წესს. მოქალაქე თენგიზ ლატარია თავისი სარჩელით საკონსტიტუციო სასამართლოს სთხოვს იმ ნორმების გაუქმებას, რაც ID ბარათის გაცემის წესებს ადგენს.
მოსარჩელე მიიჩნევს, რომ „სადავო ნორმები ეწინააღმდეგება მართლმადიდებელ ქრისტიანთა აღმსარებლობას, ვინაიდან პირადობის მოწმობისა და პასპორტის მონაცემებში არსებული პირადი ნომრები, ფოტოსურათი და ასევე სხვა მახასიათებლები წარმოადგენს ანტიქრისტეს ბეჭედს“.
სასარჩელო მოთხოვნაში ასევე წერია, რომ ID ბარათზე დატანებული სხვადასხვა ნიშანი არის მხეცის ნიშანი.
პროცესს ესწრება ორი სასულიერო პირი – მღვდელი აკაკი მელქაძე და ბასილ ახვლედიანი. ისინი, ისე როგორც მხარეები, ჯერჯერობით, კომენტარს არ აკეთებენ.
სასარჩელო განცხადებით მოქალაქემ საკონსტიტუციო სასამართლოს 2014 წლის ივნისში მიმართა.