ნეტგაზეთი • RU

„რესპუბლიკური პარტიის“ ბათუმის საარჩევნო სია – არჩევნები 2017

ბათუმის საკრებულოს რესპუბლიკელი წევრები – თემურ ყურაშვილი და ირაკლი ჩავლეიშვილი მომავალი თვითმმართველობის არჩევნებისთვის პარტიულ სიაში აღარ არიან. „რესპუბლიკურმა პარტიამ“ ახალ სახეებზე გააკეთა არჩევანი. მოვწყინდით უკვე ალბათ,“ – აღნიშნა „ბათუმელებთან“ საუბრის დროს თემურ ყურაშვილმა, „რესპუბლიკური პარტიის“ წევრმა.

თემურ ყურაშვილის ინფორმაციით, „რესპუბლიკური პარტიის“ ბათუმის საარჩევნო პარტიულ სიის სათავეში ეკონომისტი ლარისა ანდღულაძეა. იგი ბათუმის საკრებულოს წევრია მას შემდეგ, როცა გასული წლის ბოლოს ზაურ ახვლედიანმა პარტია დატოვა და აჭარის უმაღლეს საბჭოში თავმჯდომარის, დავით გაბაიძის კაბინეტის უფროსად დანიშნეს.

პარტიული სიის მეორე ნომერია ექიმი-პედიატრი გერმანე ურუშაძე, მესამე – ექიმი ქრისტინა აფხაზავა, მეოთხე – ჯონი დავითაძე, იგი პროფესიით ინჟინერ-პროგრამისტია, მეხუთე – ექიმი-ფარმაცევტი ლია სამნიძე.

რატომ გააკეთა პარტიამ არჩევანი ძირითადად ექიმებზე და არა პოლიტიკაში გამოცდილ ადამიანებზე? – თემურ ყურაშვილის თქმით, პარტიამ პროფესიონალიზმსა და ახალ სახეებზე გააკეთა აქცენტი, ადამიანებზე, რომლებიც პარტიის და მისი ღირებულებების ერთგულები არიან.

„აღმოჩნდა, რომ სხვა პარტიებსაც ბევრი ექიმი ჩაუსვამს საარჩევნო სიაში. ამ არჩევნებზე ძალიან ბევრი ექიმი კანდიდატი გვეყოლება. ჩვენს პარტიას სრულად აქვს დაცული გენდერული ბალანსი,“- დასძინა თემურ ყურაშვილმა.

ნეტგაზეთის მასალების სხვა გამოცემებში გადაბეჭდვის წესი
ავტორი