ხულოს მუნიციპალიტეტის მერობისთვის ოთხი კანდიდატი იბრძოლებს. მერობის კანდიდატები „ქართულმა ოცნებამ“, „ნაციონალურმა მოძრაობამ“, „ევროპულმა საქართველომ“ და „პატრიოტთა ალიანსმა“ წარადგინა. მერობის სამი კანდიდატი ხულოს მოქმედი საკრებულოს წევრია.
„ქართულმა ოცნებამ“ ხულოს მერობის კანდიდატად კურორტ „გოდერძის“ დირექტორის ყოფილი მოადგილე, გოჩა მელაძე დაასახელა.
„ნაციონალური მოძრაობის“ ხულოს მერობის კანდიდატი მოქმედი საკრებულოს წევრი და წინა მოწვევის საკრებულოს აპარატის უფროსი, ირაკლი ჯორბენაძეა. 2016 წლის საპარლამენტო არჩევნებზე „ნაციონალურ მოძრაობას“ ირაკლი ჯორბენაძე მაჟორიტარ დეპუტატად ჰყავდა წარდგენილი საქართველოს პარლამენტში აჭარის მთიანეთიდან.
ხულოს საკრებულოს მოქმედი წევრი, ზურაბ ტუნაძე, ხულოს მერობისთვის „პატრიოტთა ალიანსის“ სახელით იბრძოლებს. ის 2014 წელს ხულოს საკრებულოში „ბურჯანაძე დემოკრატების“ პროპორციული სიით შევიდა.
ხულოს მოქმედი საკრებულოს კიდევ ერთი წევრი – ნუგზარ სოლომონიძე იბრძოლებს ხულოს მერობისთვის. ის მერობის კანდიდატად პარტია „ევროპულმა საქართველომ“ წარადგინა. ნუგზარ სოლომონიძე 2014 წელს ხულოს საკრებულოში „ნაციონალური მოძრაობის“ კვოტით მოხვდა.
