Batumelebi | ჩანჩხალოს მოსახლეობის აქცია მთავრობის სახლთან ჩანჩხალოს მოსახლეობის აქცია მთავრობის სახლთან – Batumelebi
RU | GE  

ჩანჩხალოს მოსახლეობის აქცია მთავრობის სახლთან

 

 

სოფელ ჩანჩხალოს მცხოვრებლებმა დღეს, 31 იანვარს, აჭარის მთავრობის სახლის წინ საპროტესტო აქცია გამართეს. სოფლის მცხოვრებლები სოფელში  ჰესთან დამაკავშირებელი გვირაბის გაყვანას აპროტესტებენ. აქციის მონაწილეთა განცხადებით, სოფელი, რომელიც მეწყრული პროცესების გამო წითელ ზოლში იყო, გვირაბის მშენებლობის შემდეგ კიდევ უფრო დაზიანდა. ჩანჩხალოს მცხოვრებელთა განცხადებით, გვირაბის მშენებელ კომპანიას გეოფიზიკური დასკვნა ამ დრომდე არ წარმოუდგენია.

საპროტესტო აქცია მთავრობის სახლთან

„გეოლოგიური დასკვნები გააკეთეს, მაგრამ ამ დასკვნებმა რეალურად არაფერი აჩვენა, რადგან დასკვნა ვიზუალური დათვალიერების შედეგად დაიდო. ვინაიდან აფეთქებების შემდეგ სახლები უფრო მეტად დაიბზარა და მიწაც სულ დახეთქილია, ჩვენ გეოფიზიკური დასკვნის მომზადება მოვითხოვეთ, რომელიც დღემდე არ გაკეთებულა“ _ განაცხადა სოფლის მცხოვრებმა ბადრი მახარაძემ.

სოფელ ჩანჩხალოში მისასვლელი გზა უკვე ერთი კვირა გადაკეტილია, რის გამოც შეჩერებულია გვირაბის სამშენებლო სამუშაოები. ამის მიუხედავად, არც კომპანიის  და არც ხელისუფლების წარმომადგენლები სოფლის მცხოვრებლებს არ შეხვედრიან.

„ჩვენ მოვითხოვთ, ან გადაგვიხადოს კომპანიამ კომპენსაცია, რომ სხვაგან შევძლოთ საცხოვრებლის შეძენა, ან ხელისუფლებამ უზრუნველყოს ჩვენი უსაფრთხო ადგილზე განსახლება“- ამბობენ აქციის მონაწილეები.

ნეტგაზეთის მასალების სხვა გამოცემებში გადაბეჭდვის წესი
" ბათუმელები"