2015 წლისთვის ერთჯერადი ჭიქების შეძენაზე მთავრობის კანცელარიამ ტენდერი გასული წლის 24 დეკემბერს გამოაცხადა. სატენდერო პირობის თანახმად მთავრობა 400 000 ცალი ერთჯერადი ჭიქის შესყიდვაში მაქსიმუმ 4680 ლარს იხდიდა, თუმცა ეს ტენდერი არ შედგა, ვინაიდან მასში მონაწილეობა არავინ მიიღო.
ამჯერად საქართველოს მთავრობის ადმინისტრაციის საჭიროებისათვის ერთჯერადი ჭიქების შესყიდვაზე ტენდერი 15 იანვარს გამოცხადდა. წინადადებების მიღება 20 იანვარს დაიწყება და 22 იანვარს დასრულდება.
ჭიქების საორიენტაციო რაოდენობაა 399 000 ცალი; შესყიდვის სავარაუდო ღირებულება კი 4668,3 ლარი. ჭიქებს სასმელი წყლის დისპენსერზე განსათავსებლად შეისყიდიან.
სატენდერო პირობებით, ჭიქა უნდა იყოს დამზადებული საკვები პროდუქტებისათვის განკუთვნილი გამჭვირვალე პოლიპროპილენით; ტევადობა – 180-190 მლ; მასა არ უნდა აღემატებოდეს 1,8 გრამს. ამასთან, ჭიქები დამზადებული და შეფუთული უნდა იყოს უნდა იყოს ქარხნულად პოლიეთილენის პაკეტებში, არ უნდა იყოს დეფორმირებული. ჭიქები დაფასოებული უნდა იყოს 3000 ცალად მუყაოს ყუთში.
მიმწოდებელი ვალდებულია ერთჯერადი ჭიქების მიწოდება (ხელშეკრულების დადებიდან 2015 წლის 31 დეკემბრის ჩათვლით) განახორციელოს ეტაპობრივად, ადმინისტრაციის მიერ მოთხოვნის დაფიქსირებიდან 2-3 დღის ვადაში. მოთხოვნის მინიმალური რაოდენობა: 51 000 ცალი.
