„აჭარ ენერჯი 2007“-ს უფლება მიეცა, ხელვაჩაურის მუნიციპალიტეტში ლიცენზიის გარეშე მოიპოვოს 150 ათასი მ/კუბ სასარგებლო წიაღისეული (ძირითადად ქვიშახრეში).
კომპანიამ 100 ათასი მ/კუბ ქვიშახრეში სოფელ ერგეს (მდ. ჭოროხი), ხოლო 50 ათასი მ/კუბი სოფელ აჭარისწყლის მიმდებარე ტერიტორიაზე (მდ. აჭარისწყალი) უნდა მოიპოვოს.
„აჭარ ენერჯი 2007“ ვალდებულია მოპოვებული სასარგებლო წიაღისეული გამოიყენოს მხოლოდ ჰიდროელექტროსადგურების სამშენებლო სამუშაოების შეუფერხებლად განხორციელების მიზნით, ხოლო ლიცენზიისაგან გათავისუფლებისათვის უზრუნველყოს საქართველოს სახელმწიფო ბიუჯეტში 26 087 ლარის გადახდა ერთი თვის ვადაში.
შპს „აჭარ ენერჯი 2007“-ის მიერ ლიცენზიისაგან გათავისუფლების საფუძველზე მოპოვებული სასარგებლო წიაღისეულის მიზნობრივად გამოყენების ზედამხედველობას გარემოსდაცვითი ზედამხედველობის დეპარტამენტი განახორციელებს. კომპანია კი თავის მხრივ ვალდებულია სასარგებლო წიაღისეულის მოპოვების ვადის გასვლიდან ორი კვირის ვადაში აღნიშნულ დეპარტამენტში წარადგინოს ინფორმაცია მოპოვებული ბუნებრივი რესურსის ოდენობის შესახებ.
