აჭარის სოფლის მეურნეობის მინისტრმა, ლაშა კომახიძემ თანამდებობის დატოვების შესახებ განცხადება დაწერა. კომახიძე ბათუმის მერის არჩევნებისთვის ემზადება, იგი 2017 წლის ადგილობრივი თვითმმართველობის არჩევნებზე მმართველი პარტიის, „ქართული ოცნების“ კანდიდატი იქნება.
ლაშა კომახიძის განცხადებას აჭარის მთავრობის თავმჯდომარემ, ზურაბ პატარაძემ უნდა მოაწეროს ხელი.
ლაშა კომახიძემ 2016 წლის ივლისში, ზურაბ პატარაძის მთავრობაში დაიკავა მინისტრის სავარძელი. მანამდე, 2008 წლიდან, იგი გაეროს პროექტების კოორდინატორი იყო სოფლის მეურნეობის დარგში. უფრო ადრე კი, 1997 წლიდან 2000 წლამდე ლაშა კომახიძე ჯერ „საზღვაო ბანკის“ ანალიტიკური განყოფილების სპეციალისტი და შემდეგ საინვესტიციო განყოფილების უფროსი იყო. 2001-2003 წლებში აჭარის მთავრობის მაშინდელი თავმჯდომარის, ასლან აბაშიძის თანაშემწედ, შემდეგ კი, აჭარის ხაზინის უფროსად მუშაობდა.
ბათუმის მერობის კანდიდატს დამთავრებული აქვს ბუდაპეშტის უნივერსიტეტი ბიზნესის ადმინისტრირების მიმართულებით.
