„თავს დაგვესხნენ განსხვავებული სექსუალური ორიენტაციის გამო… პოლიციელები შეგვდგნენ წიხლებით,” – უთხრა ადმინისტრაციული წესით დაკავებულმა ლევან ბერიანიძემ ჟურნალისტებს, ვიდრე მოსამართლე სხდომათა დარბაზში შემოვიდოდა.
„თანასწორობის მოძრაობის“ ხელმძღვანელი, ლევან ბერიანიძე და ამავე ორგანიზაციის წევრი, თორნიკე კუსიანი დღეს დილით დააკავეს ადმინისტრაციული წესით – წვრილმანი ხულიგნობის და პოლიციელის კანონიერი მოთხოვნის დაუმორჩილებლობის გამო.
ლევან ბერიანიძე და თორნიკე კუსიანი ბათუმის ბულვარში დააკავეს. დაკავებულებს თან სამი ტრანსსექსუალი ქალი ახლდათ. სამართალდარღვევაში მიჩნეულების განმარტებით, მათ თავდაპირველად უცნობმა პირმა მიაყენა შეურაცხყოფა, რომელიც ბულვარში მოპედით იმყოფებოდა.
„შემდეგ სხვები მოვარდნენ. გვაგინებდნენ და გვცემდნენ. პოლიციელები მოვიდნენ, მაგრამ გაშველების ნაცვლად, ჩვენ მოგვდგნენ ისინიც… მერე დაგვაკავეს და პოლიციის მეექვსე განყოფილებაში გადაგვიყვანეს. საათობით არ გვაძლევდნენ ადვოკატთან დაკავშირების უფლებას, არც უფლებები განუმარტავს ვინმეს, ვითხოვდით ექიმს,”- ამბობს ლევან ბერიანიძე. მან ასევე აღნიშნა, რომ შემთხვევის ადგილას იყო ვიდეოკამერებიც.
დღევანდელ სხდომაზე მოსამართლეს დაკავებულების და პოლიციის წარმომადგენლის პოზიციები არ მოუსმენია. საქმის განხილვა გადაიდო, რადგან ადვოკატმა ანა მდინარაძემ სამი მოწმის დაკითხვის შუამდგომლობა დააყენა. მოწმე პოლიციელების წარმოდგენას აპირებს შინაგან საქმეთა სამინისტროც.
მოსამართლე ლაშა თავართქილაძემ შუამდგომლობა დააკმაყოფილა და საქმის განხილვა ხვალისთვის გადადო.
სასამართლო პროცესის დაწყებამდე ტრანსგენდერმა ქალმა ჟურნალისტებს უთხრა, რომ ბათუმის ბულვარში ლევან ბერიანიძესთან და თორნიკე კუსიანთან ერთად იმყოფებოდა.
„გამოვედით ღამის კლუბიდან და თავს დაგვესხა რამდენიმე პირი იმიტომ, რომ ტრანსსექსუალები ვართ. მალევე პოლიციაც მოვიდა და პოლიციელებიც თავდამსხმელებს შეუერთდნენ, გვცემდნენ. მე სადღაც ბუჩქებში გადამათრიეს. ამ დროს დააკავეს ლევანი და თორნიკე. ალბათ, მეც დამაკავებდნენ, ისევ იქ რომ ვყოფილიყავი,”- გვითხრა ტრანსგენდერმა ქალმა.
ლევან ბერიანიძე და თორნიკე კუსიანი ხელწერილის საფუძველზე გაათავისუფლეს.
ამავე თემაზე:
ადვოკატი: თანასწორობის მოძრაობის ორ წევრს პოლიციაში დამამცირებლად მოექცნენ
