თავმჯდომარის თანამდებობიდან გადაყენების საკითხი დღის წესრიგით გათვალისწინებულ 9 საკითხს შორის იყო.
„თვითმმართველობის კოდექსის „34 მუხლის თანახმად საკითხზე კენჭისყრა ფარული ხმის მიცემის პროცედურით წარიმართა. ხმების სრულად დათვლის შემდგომ საკრებულოს თავმჯდომარე ასლან კახიძე 15 ხმით- 5-ის წინააღმდეგ იქნა გადაყენებული, ხოლო ორი ბიულეტენი ბათილად გამოცხადდა, კენჭისყრაში მონაწილეობა არ მიუღია საკრებულოს ფრაქცია „ერთიანი ნაციონალური მოძრაობის“ წევრებს,” – ნათქვამია ხელვაჩაურის მუნიციპალიტეტის საკრებულოს ოფიციალურ ვებგვერდზე.
„ასეთი ფორმულირება იყო. თავმჯდომარემ საკრებულოს უმრავლესობა დაკარგაო. მე ვარ თავისუფალი დემოკრატების წევრი, მათი კვოტით გასული თავმჯდომარედ. როგორც უკვე არაკოალიციური პარტია, პოლიტიკური მოტივით გადამაყენეს,“ – უთხრას ასლან კახიძემ „ბათუმელებს“.
ასლან კახიძის თქმით, მის გადაყენებას მხარი “ქართული ოცნების” დეპუტატებთან ერთად “ბურჯანაძე-დემოკრატების” სამმა დეპუტატმაც დაუჭირა.
ხელვაჩაურის საკრებულოს თავმჯდომარის მოვალეობას ახალი თავმჯდომარის არჩევამდე ჯუმბერ ვარდმანიძე შეასრულებს. ვარდმანიძე ხელვაჩაურის საკრებულოს თავმჯდომარის მოადგილე იყო.