სამაშველო სამსახური აგრძელებს კობა ბაკურიძის ძებნას. ოჯახის წევრების თქმით, ის 3 ივლისს ბათუმში, ანბანის კოშკის მიმდებარე პლაჟზე შენიშნეს, თუმცა საღამოს შვიდი საათის შემდეგ, მისი კვალი დაიკარგა.
კობა ბაკურიძე არასამთავრობო ორგანიზაცია „ჩვენი უფლებებისთვის“ თავმჯდომარის, თამაზ ბაკურიძის ძმაა. თამაზ ბაკურიძემ ფეისბუქის საშუალებით მოსახლეობას მიმართა თხოვნით, დაეხმარონ ძმის პოვნაში:
„მინდა მივმართო მოსახლეობას და განსაკუთრებით სანაპორო ზოლზე ( ფოთი, ქობულეთი, მწვანე კონცხი, ჩაქვი, მახინჯაური სარფის) მოსახლეობას. ვინაიდან ზუსტად არ ვიცით, რომ ის ზღვაში გაუჩინარდა თუ ხმელეთზე და არსებობს სხვა ვერსიებიც, მოგმართავთ თხოვნით, იყოთ ყურადღებით, რაგდან შეიძლება კობა შველას ითხოვს, სიცოცხლეს ებრძვის. მივმართავ პოლიციას და შესაბამის სამსახურებს, ნუ ჩაეჭიდებიან მხოლოდ ზღვის ვერსიას, საჭიროა ძებნა ხმელეთზე და განსაკუთრებით სანაპიროზე.“
შსს ინფორმაციით, გამოძიება სსკ-ის 115-ე მუხლით მიმდინარეობს, რაც თვითმკვლელობამდე მიყვანას გულისხმობს. შს სამინისტროს პრესსამსახურის ინფორმაციით, კობა ბაკურიძეს ხმელეთზეც ეძებენ იმ დღიდან, როგორც კი მისი დაკარგვის შესახებ შეტყობინება შევიდა.
