დაბა ქედაში, რუსთაველის ქუჩაზე, ყოფილი „ადგილმრეწველობის კომბინატის“ შენობაში სოციალური სახლი მოეწყობა. ყოფილი კომბინატის ორსართულიანი შენობის სოციალურ სახლად გადასაკეთებლად ქედის გამგეობამ 545 070 ლარი გამოყო.
ქედის გამგებლის, დავით დუმბაძის ინფორმაციით, არსებული შენობის ფართობი შენარჩუნდება, საცხოვრებელ ბინებად გადაკეთდება და სოციალურ სახლად ქცეულ ყოფილ კომბინატის შენობაში, საცხოვრებელ ფართობს უსახლკარო სტატუსის მქონე რვა ოჯახი მიიღებს. ბინას აქ ის ორი ოჯახიც მიიღებს, რომლებიც ქედის გამგეობამ ცენტრალური მაგისტრალის გაფართოვების მიზნით უნდა აასახლოს.
„ქედის ცენტრთან შემოსასვლელი საავტომობილო მაგისტრალი ვიწროა, რაც დიდ საფრთხეს წარმოადგენს, გზის გაფართოების პროექტი დამუშავების ეტაპზეა, საავტომობილო გზების დეპარტამენტი გზის გაფართოებას იმ პირობით განახორციელებს, რომ გზასთან ახლოს მცხოვრებ ორ ოჯახს გზის გაფართოვების მიზნით გავასახლებთ… ასევე, სოფელ დოლოგანში, ძველი სკოლის ავარიულ შენობაში, უსახლკარო სტატუსის მქონე ორი ოჯახი ცხოვრობს, რომლებსაც ბინებს სოციალურ სახლში მივცემთ. ამ ორ ოჯახთან ერთად ქედაში მცხოვრები კიდევ ექვსი უსახლკარო ოჯახი მიიღებს ბინებს ამ სახლში,“ – აცხადებს დავით დუმბაძე.
ქედა, ავარიული სახლი სოფელ დოლოგანში,
სადაც უსახლკარო სტატუსის მქონე ორი ოჯახი ცხოვრობს
