Batumelebi | მოქალაქე ბათუმის საკრებულოს წინააღმდეგ მოქალაქე ბათუმის საკრებულოს წინააღმდეგ – Batumelebi
RU | GE  

მოქალაქე ბათუმის საკრებულოს წინააღმდეგ

 

ორგანიზაცია  „საქართველოს მშრომელთა საბჭოს აჭარის რეგიონალური ორგანიზაციის“ თავმჯდომარე, მერაბ გორგაძე ბათუმის საკრებულოში საკუთრების უფლების აღიარების კომისიის არ არსებობას აპროტესტებს. მისი განცხადებით, კომისია ამ დრომდე უნდა დაკომპლექტებულიყო, რადგან კონკრეტულ მოქალაქეებს პრობლემები ექმნებათ.

 

მერაბ გორგაძე

 

 

„ახალი საკრებულო სამი თვეა უკვე თავის უფლებამოსილებას ახორციელებს, თუმცა საკრებულოში არ ფუნქციონირებს ერთ-ერთი ძირითადი კომისია, ეს არის საკუთრების აღიარების კომისია. ამ ხნის განმავლობაში საკრებულომ ვერ მოაბა თავი კომისიის დაკომპლექტებას და კომისიის თავმჯდომარის დანიშვნას, რაც მოქალაქეებს პრობლემებს უქმნის. ჩვენ მოგვმართა მოქალაქემ რომელიც მიწის შესყიდვას აპირებს,  თუმცა ნასყიდობის ხელშეკრულების გაფორმება  არ ხერხდება, რადგან  საჯარო რეესტრი  ითხოვს ინფორმაციას  იმის თაობაზე, რომ აღნიშნულ მიწაზე არ მიმდინარეობს ადმინისტრაციული წარმოება“-აცხადებს მერაბ გორგაძე.

 

 

ორგანიზაციის წარმომადგენელი, სხვა დეტალებზეც საუბრობს: „საკრებულოს უუნარობის მაჩვენებლია ის ფაქტიც, რომ რამდენიმე კვირის წინ მათ განცხადებით მივმართეთ  წყლის ძველი დავალიანებების საკითხთან დაკავშირებით, ადმინისტრაციული  კანონით დადგენილი ვადები გასულია, თუმცა პასუხი დღემდე არ მიგვიღია.  მე ვადანაშაულებ საკრებულოს ადმინისტრაციული კანონის დარღვევაში“. 

 

 

საკრებულოს წევრი ფრაქცია „ქართული ოცნებიდან“ ირაკლი მიქელაძე აცხადებს, რომ მიწის საკუთრების აღიარების კომისია, მომდევნო კვირაში დაკომპლექტდება:

 

 

„თუ რა ვადებში უნდა ჩამოყალიბებულიყო კომისია, კანონში მითითებული  არ არის. ჩვენ არ გვინდოდა ნაჩქარევად გაკეთება, მომდევნო კვირაში კი აუცილებლად დაკომპლექტება“-აცხადებს ის.  

 

 

ნეტგაზეთის მასალების სხვა გამოცემებში გადაბეჭდვის წესი
ლელა დუმბაძე