Batumelebi | მთავრობა სტიქიის შედეგად მიყენებულ ზარალს ითვლის – ვინ მიიღებს კომპენსაციას მთავრობა სტიქიის შედეგად მიყენებულ ზარალს ითვლის – ვინ მიიღებს კომპენსაციას – Batumelebi
RU | GE  

მთავრობა სტიქიის შედეგად მიყენებულ ზარალს ითვლის – ვინ მიიღებს კომპენსაციას

 

მთავრობისთვის უცნობია, რა ზარალი მიაყენა წყალდიდობამ და მეწყერმა აჭარის რეგიონს. კრიზისების მართვის სპეციალურ კომისიას ჯერ არც ქალაქის დატბორვით მიყენებული ზარალი დაუთვლია. დასჭირდება თუ არა აჭარას ცენტრალური ბიუჯეტიდან სუბსიდია, ეს მხოლოდ  კომისიის მიერ ანგარიშების დასრულების შემდეგ გახდება ცნობილი. „ბათუმელების“ კითხვებს სახელმწიფო უსაფრთხოებისა და კრიზისების მართვის საბჭოს წარმომადგენელმა ნიკოლოზ ქავთარაძემ უპასუხა.

  

 

ბატონო ნიკა, თუ შეისწავლეთ ზარალი, რა ინფორმაციაა ამ დროისთვის ცნობილი?   

 

 

კომისია მუშაობს, თუმცა შედეგები ჯერ არ არის ცნობილი. ვიცით, რომ ზოგან გზები გადაკეტეს, ზოგან ინფრასტრუქტურა დაზიანდა. ორი ხიდი დაზიანდა ხელვაჩაურში, სტიქიის პერიოდში მოხდა 19 ოჯახის ევაკუირება და დროებით თავშესაფარში გადაყვანა. აქედან რვა ოჯახი იყო ხელვაჩაურში და ორი ქობულეთში.

 

 

ამ ოჯახებს რა ტიპის დახმარებას გაუწევს მთავრობა, შეძლებენ სახლში დაბრუნებას, თუ ახალი საცხოვრებელი ესაჭიროებათ?

 

 

მათი სახლები დანგრეული არ არის, ევაკუაცია იმიტომ განხორციელდა, რომ იმ ეტაპზე საფრთხე ემუქრებოდათ.

 

 

მოქალაქეებმა, ვინც თავს მიიჩნევს დაზარალებულად, ვის უნდა მიმართონ კომპენსაციის თაობაზე და რა მეთოდით დაითვლით ზარალს?

 

 

ზარალს კანონის შესაბამისად შევისწავლით, შესწავლას ახორციელებს სპეციალური კომისია, რომელიც როგორც აჭარის მთავრობის, ასევე მუნიციპალიტეტების დონეზე მუშაობს.

 

 

მოქალაქემ თვითონ უნდა მიმართოს კომისიას, თუ როგორ აპირებთ ინფორმაციის შეგროვებას?

 

 

მოქალაქესაც შეუძლია მიმართოს კომისიას. შემდეგ კი, კომისია მიიღებს გადაწყვეტილებას, გასცეს თუ არა კომპენსაცია. 

 

 

კანონი იმ პირების კომპენსირებას თუ ითვალისწინებს, ვისაც სავაჭრო ცენტრებში გასაყიდი ელექტროსაქონელი დაუზიანდა? როგორც ვიცით, ასეთი ბევრი შემთხვევა დაფიქსირდა ქალაქში.

 

 

ყველა მიმართულებით და ყველა შემთხვევასთან დაკავშირებით კომისია იხელმძღვანელებს კანონით, მე ნუ მომთხოვთ კანონის განმარტებას, რადგან იურისტი არ ვარ. კომპენსაცია რომ გაიცეს, ზარალი განსაკუთრებული მნიშვნელობის უნდა იყოს. ასეთია, მაგალითად, საცხოვრებელი სახლის გაუვარგისება, ან ჭერის ჩამონგრება იმ დონეზე, რომ საფრთხე შეიძლება შეუქმნას ადამიანის სიცოცხლესა და ჯანმრთელობას, ასეთ ზარალზე პირველ რიგში იქნება ყურადღება. ეჭვი მეპარება, რომ კონკრეტულ ერთეული ტექნიკის კომპენსირებაზე იყოს საუბარი. 

 

 

გასაგებია, რომ სრული ანგარიში არ აქვს მთავრობას ამ ეტაპზე, მაგრამ წინასწარი შეფასებით როგორი სურათი იკვეთება, გაწვდება აჭარის ბიუჯეტი სტიქიის შედეგების კომპენსირებას, თუ დასჭირდება ცენტრალური ბიუჯეტიდან დახმარება?

 

 

გამიჭირდება თქმა. პირველ რიგში, აჭარის ბიუჯეტზე იქნება საუბარი, რადგან მათი კომპეტენციაა ამ პრობლემების მოგვარება, მაგრამ თუ გაჩნდება დახმარების საჭიროება, შესაბამისი პროდეცურები განხორციელდება.

 

 

როდის უნდა წარმოადგინოს კომისიამ საბოლოო ანგარიში?

 

 

რთული პროცესია, ამიტომ დროს და ვადას ვერ გეტყვით, ბევრი მეწყრული ზონაა და შესწავლა სჭირდება. პირველივე დღეებში ასობით განაცხადი შევიდა კომისიაში და ყველა საჭიროებს შესწავლას.

 

 

სინოპტიკოსებთან თუ მიდის მუშაობა, ამინდის გრძელვადიანი პროგნოზის შესწავლის თაობაზე  და თუ მიიღებს მოსახლეობა დროულად ინფორმაციას მსგავსი სტიქიური პროცესების განმეორების შემთხვევაში?  

 

 

რა თქმა უნდა. სინოპტიკოსებთან და სხვა სამსახურის წარმომადგენლებთანაც არის მუდმივი კოორდინაცია. საფრთხის გაჩენის შემთხვევაში ყველა სამსახური მზად იქნება.   

 

ძლიერი წვიმა ბათუმში. გელა ძნელაძის ფოტო
ძლიერი წვიმა ბათუმში. გელა ძნელაძის ფოტო

ნეტგაზეთის მასალების სხვა გამოცემებში გადაბეჭდვის წესი
ლელა დუმბაძე