Batumelebi | შეურაცხმყოფელი შეფასებები სკოლის დირექტორების გასაუბრებაზე შეურაცხმყოფელი შეფასებები სკოლის დირექტორების გასაუბრებაზე – Batumelebi
RU | GE  

შეურაცხმყოფელი შეფასებები სკოლის დირექტორების გასაუბრებაზე

 

 

აჭარის განათლების სამინისტროში, სკოლის დირექტორობის კანდიდატებთან გასაუბრების შესახებ, TV4–ის ეთერში გასულ სიუჟეტში, კომისიის ერთ–ერთი წევრის კომპიუტერის მონიტორზე ჩანს თუ რა შეფასებებს აძლევს იგი მის წინ მჯდომ კანდიდატს: “წინ აკლია სამი კბილი და ცოტათი ჰგავს ვამპირს, მისი სამოქმედო გეგმაა ის, რომ სკოლა იყოს რეპეტიტორის გარეშე. მიაჩნია რომ მას მერე, რაც მუშაობა დაიწყო დირექტორად, არც ერთი მოსწავლე არ გასულა სკოლის გარეთ და არ უმეცადინია?????”. 

 

 

 

გასაუბრებაზე, რომელიც 2 სექტემბერს გაიმართა აჭარის განათლების სამინისტროში, კომისიის წევრებს სერტიფიცირებული დირექტორების მიერ სკოლის განვითარების სტრატეგია უნდა შეეფასებინათ. კომისიის წევრის მიერ შესავსებ ცხრილში, რამდენიმე ძირითადი კრიტერიუმია: სკოლის მისია და არსებული სიტუაცია; განვითარების ძირითადი მიმართულება; სტრატეგია და პრიორიტეტები; შეფასების ინდიკატორ შედეგები, თუმცა კანდიდატის ვიზუალური აღწერილობა არსად არის მითითებული.

 

კომისიის წევრი ლევან ზარდიაშვილი, რომლის მონიტორზეც, ერთ–ერთი კანდიდატის გარეგნობის შესახებ შეურაცხმყოფელი შეფასებები ჩანს, საქართველოს მანდატურის სამსახურთან არსებული ფსიქოლოგიური ცენტრის ხელმძღვანელია.

 

კანდიდატი, რომელსაც ლევან ზარდიაშვილი შეურაცხმყოფელი ეპითეთებით აფასებს ერთ-ერთი სკოლის დირექტორია ბათუმში.

 

კითხვაზე თუ რამდენად კომპეტენტურია კომისიის წევრი, რომელიც მსგავსი ეპითეტებით აფასებს კანდიდატს, განათლების სამინისტროში პასუხობენ, რომ მის კომპეტენციაში ეჭვი არ ეპარებათ. მათივე ინფორმაციით, ბლანკები, რომლებიდანაც შემდეგ მონაცემები უნდა შეჯერებულიყო, განათლების სამინისტროს არ ჰქონია. 

ის ბლანკი, რასაც ის ავსებს, არ არის არანაერი ოქმი ან ოფიციალური დოკუმენტი. ის მისი პირადი ჩანაწერია და მისი გასაჯაროება ნამდვილად არ იყო მიზანშეწონილი, მაგრამ მაინც მოხდა” – ამბობს ნატა ასათიანი, განათლების სამინისტროს საზოგადოებასთან ურთიერთობის დეპარტამენტის უფროსი.

 

„ბათუმელებმა“ კომისიის წევრთან, ლევან ზარდიაშვილთან დაკავშირებაც სცადა, თუმცა იგი სატელეფონო ზარებს არ პასუხობს. 

ნეტგაზეთის მასალების სხვა გამოცემებში გადაბეჭდვის წესი
" ბათუმელები"