მთავარი,სიახლეები

ბათუმის ცენტრალურ ქუჩებში მოძრაობის მიმართულებები შეიცვლება

27.06.2017 • 6660
ბათუმის ცენტრალურ ქუჩებში მოძრაობის მიმართულებები შეიცვლება

ბათუმის საკრებულოს თავმჯდომარე ლაშა სირაბიძე ბათუმში საავტომობილო გზების განტვირთვის მიზნით ზურაბ გორგილაძის ქუჩაზე მოძრაობის შეზღუდვის წინადადებით გამოდის. საკრებულოს თავმჯდომარე მიიჩნევს, რომ ამ ქუჩაზე ცალმხრივი მოძრაობა უნდა დაწესდეს, რაც, მისი აზრით, ხელს შეუწყობს ქალაქის ცენტრალურ ქუჩებში მოძრაობის ოპტიმიზაციას.

საკრებულოს თავმჯდომარის განკარგულების პროექტი ამ საკითხთან დაკავშირებით უკვე მზადაა და მას ხვალ, 28 ივნისს, საკრებულოს სხდომაზე განიხილავენ.

განკარგულების პროექტის მიხედვით, ცალმხრივი მოძრაობის ტრაექტორია ასე განისაზღვრება: ცალმხრივი იქნება გორგილაძის ქუჩა სრულად, ბარათაშვილის ქუჩიდან მეგობრობის გამზირამდე [იუსტიციის სახლის მიმდებარედ] მიმართულებით.

გორგასლის ქუჩაზე კი დაგეგმილია ცალმხრივი მოძრაობის მიმართულების შეცვლა. ნაცვლად დღეს არსებული ტრაექტორიისა [ქუთაისის ქუჩიდან გრიბოედოვის ქუჩისკენ] ავტომობილები პირიქით, ცალმხრივად იმოძრავებენ გრიბოედოვის ქუჩიდან ქუთაისის ქუჩამდე. რაც შეეხება გორგასლის ქუჩას გრიბოედოვიდან ჯავახიშვილის ქუჩამდე მონაკვეთში, აქ, პროექტის მიხედვით, შენარჩუნდება ორმხრივი მოძრაობა იქამდე, ვიდრე ფარნავაზ მეფის ქუჩა არ შეუერთდება ფიროსმანის ქუჩას.

განკარგულების მიხედვით, საკრებულომ საკითხის მომზადებისას გაითვალისწინა „იუენდიპის“ კვლევის შედეგები და რეკომენდაციები.

განკარგულების პროექტში ასევე ნათქვამია, რომ პროექტის განხორციელება დაკავშირებულია მცირე ხარჯთან, რაზეც შესაბამისი პროექტით  მერიამ საკრებულოს უნდა მიმართოს.

 

გადაბეჭდვის წესი


ასევე: