შეფასებისა და გამოცდების ეროვნული ცენტრის ოფიციალური ინფორმაციით, რომელიც „ბათუმელებს“ წერილობით მოგვაწოდეს, 2017 წლის საატესტატო გამოცდების საბოლოო შედეგები უკვე ცნობილია. ამ შედეგების მიხედვით, წელს ატესტატს 12 803 მოსწავლე ვერ აიღებს.
2017 წლის საატესტატო გამოცდებზე 48 434 მოსწავლე იყო რეგისტრირებული. აქედან, რეგისტრაციის შემდეგ გამოცდებზე არ გავიდა 1371 მოსწავლე, გამოცდები წარმატებით დაძლია 34 260 მოსწავლემ.
ერთ საგანში მაინც განმეორებით გავიდა 13 941 მოსწავლე, ხოლო განმეორებითი გამოცდა წარმატებით დაძლია 5 562-მა მოსწავლემ.
ვერ მოიპოვა დადებითი შეფასება ანუ ატესტატის გარეშე დარჩა 12 803 მოსწავლე. ყველაზე მეტი მოსწავლე წელს უცხო ენაში, მათემატიკაში, ფიზიკასა და ისტორიაში ჩაიჭრა, შემდეგ მოდის ქართული ენა, ლიტერატურა და ბიოლოგია.
შეფასებისა და გამოცდების ცენტრის ინფორმაციით, საქართველოს განათლებისა და მეცნერების მინისტრის 2011 წლის 7 აპრილის ბრძანებით დამტკიცებული „სკოლის გამოსაშვები გამოცდების ჩატარების წესისა და პირობების“ თანახმად, „იმ მოსწავლეებისათვის, რომლებიც სწავლობენ განვითარების შეფერხების (შემეცნებითი ფუნქციებისა და ადაპტური ქცევის დეფიციტის), სენსორული (სმენისა და მხედველობის) დარღვევების მიხედვით სპეციალიზებულ სკოლებში, აღნიშნული ზოგადსაგანმანათლებლო დაწესებულებები უზრუნველყოფს გამოცდის ჩაბარებას მათ მიერ დადგენილი პროცედურების მიხედვით“.
სპეციალური საგანმანათლებლო საჭიროების მქონე მოსწავლეებისთვის, რომლებიც არ არიან განვითარების შეფერხების (შემეცნებითი ფუნქციებისა და ადაპტური ქცევის დეფიციტის), სენსორული (სმენისა და მხედველობის) დარღვევების მიხედვით სპეციალიზებული სკოლის მოსწავლეები, მათთვის გამოცდები ტარდება მულტიდისციპლინური გუნდის მიერ შერჩეულ ზოგადსაგანმანათლებლო დაწესებულებებში ან ცენტრის მიერ.
2017 წლის საატესტატო გამოცდების საბოლოო შედეგები
