დავით მამისეიშვილი ბათუმის საქალაქო სასამართლოს თავმჯდომარედ აირჩიეს


ბათუმის საქალაქო სასამართლოს თავმჯდომარე მომდევნო სამი წლის განმავლობაში მოსამართლე დავით მამისეიშვილი იქნება. გადაწყვეტილება იუსტიციის უმაღლესმა საბჭომ მიიღო, სადაც კიდევ 10 საქალაქო სასამართლოს თავმჯდომარე აირჩიეს.

დავით მამისეიშვილი მოსამართლეა 2008 წლიდან. თავდაპირველად იგი ქედაში, შემდეგ კი ხელვაჩაურის რაიონულ სასამართლოში მუშაობდა. 2013 წლიდან დავით მამისეიშვილი ბათუმის საქალაქო სასამართლოს მოსამართლეა და ამავდროულად – სასამართლოს თავმჯდომარე.

მოსამართლეობამდე დავით მამისეიშვილი მუშაობდა შინაგან საქმეთა სამინისტროში, ფინანსურ პოლიციასა და პროკურატურაში გამომძიებლად.

2016 წლის 14 ივლისს დავით მამისეიშვილი ბათუმის საქალაქო სასამართლოს სამოქალაქო საქმეთა კოლეგიაში აირჩიეს სამწლიანი გამოსაცდელი ვადით. იმავე წლის 19 სექტემბრიდან დავით მამისეიშვილი სისხლის სამართლის კოლეგიაშიც გამწესდა. ამ დროისთვის მოსამართლეების უვადოდ გამწესების წესი არ მოქმედებდა.

მოსამართლეობის ვადა დავით მამისეიშვილს 2019 წელს ეწურება, თავმჯდომარე კი შესაძლოა 2020 წლამდე იყოს, თუკი იუსტიციის უმაღლესი საბჭო მისი უვადო მოსამართლედ გამწესების გადაწყვეტილებას მიიღებს.

იუსტიციის საბჭოს გადაწყვეტილებით ხელვაჩაურის რაიონული სასამართლოს თავმჯდომარე მომავალი სამი წლის განმავლობაში მოსამართლე ხვიჩა კიკილაშვილი იქნება.

ნეტგაზეთის მასალების სხვა გამოცემებში გადაბეჭდვის წესი
ავტორი