დღეს, 9 ივნისს, ქედაში მომხდარი ავტოსაგზაო შემთხვევის შედეგად დაშავებულების მდგომარეობა სტაბილურია. „ბათუმელების“ ინფორმაციით, სამი დაშავებულიდან – ცოლ-ქმარი და ბავშვი – ორი უკვე გაწერეს საავადმყოფოდან, ერთი კი ბათუმში, საავადმყოფოშია გადაყვანილი.
ქედის საავადმყოფოს ქირურგისა და მენეჯერის ფრიდონ სირაბიძის ინფორმაციით, ავტოსაგზაო შემთხვევის დროს დაშავებული ქალი რეანომობილით ბათუმის რეფერალურ საავადმყოფოში სხვადასხვა სახის ტრავმებით გადაიყვანეს.
ავტოსაგზაო შემთხვევა ქედაში, ბათუმი-ახალციხის ცენტრალურ საავტომობილო მაგისტრალზე სოფელ პირველ მაისთან დაახლოებით ორი საათის წინ მოხდა. მსუბუქი ავტომობილი გზიდან ხევში გადავარდა. დაშავებულები მდინარე აჭარისწყლის კალაპოტიდან მაშველებმა ამოიყვანეს.
ქედის სასწრაფო დახმარების სამსახურის მორიგე ექიმის ცნობით, სასწრაფომ დაშავებულები ქედის საავადმყოფოში გადაიყვანა. სამივე დაშავებულიდან, ქალის მდგომარეობა მძიმე, მამაკაცისა და ბავშვის საშუალო სიმძიმის იყო.
შინაგან საქმეთა სამინისტროს ინფორმაციით ფაქტზე აღძრულია სისხლის სამართლის საქმე სს კოდექსის 276-ე მუხლის პირველი ნაწილით.
