წიგნები ემიგრანტებისთვის – საიას აქცია ბათუმში

2 ივნისს, 15:00 საათზე, ბათუმის საზაფხულო თეატრში, საქართველოს ახალგაზრდა იურისტთა ასოციაცია (საია) გამართავს ღონისძიებას – „წიგნები საქართველოდან ემიგრანტებისთვის“. კამპანიის მიზანია წიგნების შეგროვება და გაგზავნა ემიგრანტებისთვის სხვადასხვა ქვეყანაში. წიგნები შეგროვდება თეატრის ფოიეში. „გელოდებით თქვენ  მიერ შერჩეული წიგნით, რომლის გაგზავნასაც ისურვებდით ემიგრანტებისათვის (სასურველია, თქვენივე მიძღვნით/წარწერით)“ – აღნიშნულია საიას პრესრელიზში.

ახალგაზრდა იურისტთა ასოციაციის ინფორმაციით, ამ კამპანიის იდეა გაჩნდა საიას მიგრაციის პროექტის ფარგლებში ემიგრანტებთან გამართული შეხვედრების შედეგად, როცა ემიგრანტებმა ხუთი სხვადასხვა ქვეყნიდან (პოლონეთი, თურქეთი, საბერძნეთი, უკრაინა, იტალია), საურთიერთობო სივრცის შექმნის მიზნით, გამოთქვეს ბიბლიოთეკის შექმნის/გამდიდრების სურვილი.