ქობულეთის მუნიციპალიტეტის გამგეობა ზაფხულისა და ზღვის სეზონს ღონისძიება „ქობულეთობით“ გახსნის. გამგეობაში გვითხრეს, რომ სეზონის გახსნას და „ქობულეთობას“, რომელიც 5 დღე გასტანს, უკვე წლებია ერთმანეთთან აიგივებენ; „წელსაც, დაგეგმილი აქტივობებით გავხსნით სეზონს“.
სეზონი ქობულეთში წელს ოფიციალურად 28 ივნისს გაიხსნება. სეზონის გახსნის [„ქობულეთობის“] ორგანიზებისთვის გამგეობამ ელექტრონული ტენდერი გამოაცხადა.
ქობულეთის გამგეობას სეზონის გახსნის ღონისძიებებისთვის 30 ათასი ლარი აქვს გამოყოფილი, შესაბამის მომსახურებას მას ინდმეწარმე დიანა ვასაძე 28 ათას 671 ლარად სთავაზობს. ინდმეწარმე, რომელიც ტენდერში ერთადერთი მონაწილე იყო, სატენდერო კომისიას ჯერ გამარჯვებულად არ გამოუვლენია.
სატენდერო დოკუმენტების მიხედვით, ქობულეთში სხვადასხვა მომსახურება და ღონისძიებაა დაგეგმილი. მათ შორის:
[checklist]
- ექსკურსია [მაღალი დონის ავტობუსით – კომფორტული , ინტერნეტით, ცხელი და ცივი წყლის მომსახურებით] – 20 კაცზე მარშრუტი: ქობულეთი, შეკვეთილი, კოლეჯი, მუზეუმი, ციხისძირი, ქობულეთი;
- ბავშთა გასართობი პროგრამა;
- საზეიმო კონცერტი [მომღერალები ბენდით – ცოცხალი შესრულება];
- DJ [დიჯეის უნდა ჰქონდეს საავტორო პროგრამა და ფერების ფესტივალის მონაწილეობის გამოცდილება. დიჯეიმ უნდა წარმოადგინოს საათნახევრიანი პროგრამა];
- კლასიკური მუსიკა [კვარტეტი – ვიოლინო 2, ჩელო, საქსაფონი];
- სასტუმრო 15 კაცზე [ოფიციალური სტუმრებისთვის – მაღალი დონის ნომრებით, ზღვისპირა ხედით, ლიფტით, საუნით, სავარჯიშო დარბაზით, აუზითა და საუზმით. სრული 3 დღე];
- ფაეტონი, ფოიერვერკები, ფერადი ფხვნილები, ყვავილები, საჩუქრები;
- საზეიმო ვახშამი – მაღალი კლასის საბანკეტო დარბაზი 110 პერსონაზე [მენიუ ჩადებულია სატენდერო პირობებში], დამოუკიდებელი ავტოსადგომი, მისაღები დარბაზი, ლიფტი; საბანკეტო დარბაზი უნდა იყოს აღჭურვილი კომფორტული მაგიდითა და რბილი სკამებით, საცეკვაო სცენითა და თანამედროვე განათებით;
- დაგეგმილია ასევე სურსათის შეძენა იმიტირებული ქორწილისთვის და საგამოფენო ფურშეტისთვის.
[/checklist]
ღონისძიებები, რომელთა ჩატარების ზუსტი თარიღი და დრო გამგეობასთან დაზუსტდება, ქობულეთში 28 ივნისიდან 3 ივლისამდე გაგრძელდება.
ქობულეთში ამ დროისთვის პლაჟის კეთილმოწყობის სამუშაოები დასასრულებელია. ქობულეთის გამგეობაში „ბათუმელებს“ უთხრეს, რომ პლაჟის დასუფთავება რამდენიმე დღეში დასრულდება.
ქობულეთის პლაჟი / ფოტო არქივიდან
ამავე თემაზე:
ბათუმში სამაშველო სამსახურმა ზღვის სეზონი გახსნა
ბათუმში ზღვაზე ბანაობის სეზონი გაიხსნა [Photo]
სად არის ყველაზე სუფთა ზღვა აჭარის პლაჟზე
