Batumelebi | პატიმრის ოჯახი: ხელისუფლებას ვთხოვთ სიმართლის დადგენას პატიმრის ოჯახი: ხელისუფლებას ვთხოვთ სიმართლის დადგენას – Batumelebi
RU | GE  

პატიმრის ოჯახი: ხელისუფლებას ვთხოვთ სიმართლის დადგენას

 

38 წლის პატიმრის, იმედა სურმანიძის ოჯახის წევრები და ახლობლები სამართალდამცავ ორგანოებს პატიმრის საქმის ხელახლა შესწავლას სთხოვენ. დღეს ამ მოთხოვნით მათ აქცია გამართეს პოლიციის სამმართველოსა და იუსტიციის სახლთან. 

 

ოჯახის ინფორმაციით, იმედა სურმანიძე 2010 წელს დააკავეს ნარკოტიკების შენახვა-რეალიზაციის ბრალდებით. მას 12 წელი ჰქონდა მისჯილი, ამინისტრიის შემდეგ კი სასჯელი შეუმსუბუქდა, თუმცა ოჯახის წევრები ამბობენ, რომ პატიმარი ორჯერ იყო საავადმყოფოში გადაყვანილი, მისი მდგომარეობა მძიმეა და ისინი სიმართლის დადგენას ითხოვენ, რადგან ბრალდების ერთ-ერთმა მთავარმა მოწმემ ჩვენება შეცვალა.  

 

 

„სამნი დაიჭირეს, თავიდან ორი ამბობდნენ, რომ იმედა სურმანიძემ მისცა მათ წამალი, ისინი საპროცესო შეთანხმებით გამოვიდნენ. ხელისუფლების შეცვლის შემდეგ მათ ჩვენება შეცვალეს და ხელახლა მისცეს ჩვენება, რომ იმედა სურმანიძე წამალი მათთვის არ მიუცია და თქვეს, მაიძულეს ასეთი ჩვენების მიცემაო. ჩვენი თხოვნაა, ხელახლა განიხილონ საქმე და სიმართლე დადგინდეს“ – ამბობს მალხაზ სურმანიძე, პატიმრის ძმა.

 

„დანაპირები სამართლიანობის აღდგენის პროცესი უნდა დაიწყოს ქვეყანაში. დღეს ეს ხალხი მარტო იმედა სურმანიძეს კი არ უდგას გვერდით, არამედ ყველა იმ ადამიანს, ყველა იმ პატიმარს, რომლებიც დღეს წინა ხელისუფლების მსხვერპლნი არიან და სასჯელს უკანონოდ იხდიან  ციხეში, ბევრი მათგანი კრიტიკულ მდგომარეობაშია. ჩვენ უნდა ვიაქტიუროთ, ვიბრძოლოთ, რომ მათ მიმართ აღდგეს სამართლიანობა. მე გავეცანი ამ საქმეს, ოჯახის წევრების, მოწმის ინფორმაციას, რომელმაც განაცხადა, რომ თავის დროზე სახელმწიფო ოპერატიული დეპარტამენტის და სხვა წყებების ერთობლივი ღონისძიების შედეგად იქნა მიცემული ცრუ ჩვენება, რომ თითქოსდა ადგილი ჰქონდა ნარკოტკის შენახვა-გადაზიდვა-რეალზაციას. ამ შემთხვევაში ყველა ცივილიზებულ ქვეყანაში ხდება დაუყოვნებლივ საქმის გადახედვა და ყველა დამნაშავე პირის დასჯა, რაც ჩვენ ქვეყანაში ჯერ ვერ ხდება“ –  განაცხადა აქციიაზე მყოფმა ადამიანის უფლებადამცველმა თამაზ ბაკურიძემ.

 

 

 

ნეტგაზეთის მასალების სხვა გამოცემებში გადაბეჭდვის წესი
ნანა კვაჭაძე