“დემოკრატიის ინსტიტუტი ეხმიანება საქართველოს ხელისუფლების პირველი პირების განცხადებებს, რომლებიც აშკარად შეურაცხყოფს საქართველოში მოქმედი არასამთავრობო ორგანიზაციების საქმიანობას და ძალიან ცუდ მაგალითს იძლევა რეგიონებში და ქალაქებში მოქმედი “ქვედა დონის ხელისუფლების” წარმომადგენლებისათვის. პრემიერ-მინისტრის განცხადება, რომ [კამპანია “ეს შენ გეხება” პირდაპირი მნიშვნელობით ქვეყნის ძირგამომთხრელი საქმიანობაა და იგი აზიანებს ქვეყნის ინტერესებს] – არის შეურაცხმყოფელი, უსაფუძვლო და მიგვაჩნია, რომ ქართულ არასამთავრობო ორგანიზაციებს ამ განცხადებისათვის პრემიერ-მინისტრმა ბოდიში უნდა მოგვიხადოს.
მიუღებელია ვიცე-პრემიერ კახა კალაძის განცხადება: “მინდა ვკითხო ამ ადამიანებს და ორგანიზაციებს – რატომ იყავით ჩუმად ეს წლები? სად იყო თუნდაც მოძრაობა “ეს შენ გეხება”, სად იყო ანალოგიური აქტივობა?”.
ბატონო კახა! ჩვენ ჩუმად არასდროს ვყოფილვართ და პოზიციებიც არასდროს შეგვიცვლია! ჩვენ მაშინაც ამავე პოზიციებზე ვიდექით და ამის შესახებ უბრალოდ იმიტომ არ გაქვთ ინფორმაცია, რომ მაშინ თქვენ ნაკლებად გაინტერესებდათ ადამიანის უფლებები, სიტყვის თავისუფლება, ზოგადად დემოკრატიული ღირებულებები.
ხელისუფლება შესაძლოა არ ეთანხმებოდეს არასამთავრობო ორგანიზაციების ინიციატივას, კანონპროექტს, შეხედულებებს, მაგრამ ეს არანაირად არ წარმოადგენს სამოქალაქო ორგანიზაციების სახელმწიფო ღალატში დადანაშაულების საფუძველს.
მიგვაჩნია, რომ ხელისუფლების ამგვარი დამოკიდებულება სამოქალაქო ორგანიზაციების მიმართ, მართლაც რომ ხელს უშლის ქვეყანაში დემოკრატიული ინსტიტუტების გაძლიერებისა და ქვეყნის ევროპულ ოჯახში ინტეგრაციის პროცესს”.
