ცოტნე ანანიძეს აჭარის ტელევიზიაზე გადაცემა „სამართალი ხალხისთვის“ მიჰყავს. როგორც ტელევიზიის დირექტორი, სოსო სტურუა ამბობს ანანიძე გადაცემის წამყვანობას და ახალ თანამდებობას ერთმანეთს შეუთავსებს.
„ცოტნე არის იურისტი, საკმაოდ კარგი სატელევიზიო უნარებიც გამოავლინა. მიჰყავს საზოგადოებრივ-პოლიტიკური თოქ-შოუ. ერთ წელზე მეტია გადის ეთერში. არის ეთიკის ქარტიის წევრი. ამ უნარებით შევარჩიეთ მოადგილედ,“ – განაცხადა საზოგადოებრივი მაუწყებლის აჭარის ტელევიზისა და რადიოს დირექტორმა სოსო სტურუამ „ბათუმელებთან“ საუბარში.
აჭარის ტელევიზიის დირექტორს სულ ორი მოადგილე ჰყავს.
ცოტნე ანანიძე პოლიტპატიმრის სტატუსით 2013 წლის 29 დეკემბერს გაათავისუფლეს. იგი 2011 წლის 21 მაისს აჭარის ტელევიზიასთან გამართული აქციის ერთ-ერთი მონაწილე იყო. აჭარის ტელე-რადიოდეპარტამენტის პიკეტირებისა და პოლიციისადმი დაუმორჩილებლობის ბრალდებით მასთან ერთად შვიდი ადამიანი იხდიდა სასჯელს. ცოტნე ანანიძემ ბრალი აღიარა და მას ორწლიანი პატიმრობა მიუსაჯეს. მისი განცხადებით, ბრალი ზეწოლის შედეგად აღიარებინეს.
