საკურას შესაძენად გამოცხადებული პირველი ტენდერი ჩავარდა. განმეორებით ტენდერში კი კომპანია „ვანის სათბურებმა“ გაიმარჯვა. ბათუმში საკურას ხეივნის გაშენება დრამატული თეატრის უკან, ილია ჭავჭავაძის ძეგლის მიმდებარე ტერიტორიაზეა დაგეგმილი. თუმცა როგორც გამწვანებისა და ლანდშაფტური დაგეგმარების სამსახურის უფროსი ეთერ მაჭუტაძე ამბობს, შესაძლოა საკურას ხეივნის გაშენების ადგილი ისევ შეიცვალოს.
„პირველი ტენდერი ჩაიშალა იმის გამო, რომ ვერ მოგვაწოდა საკურა ტენდერში გამარჯვებულმა კომპანია „საქართველოს ნერგებმა“. შესყიდვების სააგენტო ალბათ შავ სიაში ჩასვამს, რადგან ხელშეკრულებით ნაკისრი ვალდებულებები არ შეასრულა. მეორე ტენდერი გუშინ დამთავრდა. გამარჯვებულ კომპანიას – „ვანის სათბურები“ ორშაბათს გავუფორმებთ ხელშეკრულებას. 25-30 რიცხვისთვის უნდა მოიტანონ საკურას ნერგები,“ – ამბობს ეთერ მაჭუტაძე.
კითხვაზე, ხომ არ დაგვიანდება საკურას დარგვა, ეთერ მაჭუტაძე პასუხობს, რომ ნერგები კონტეინერებით ჩამოაქვთ, ფესვთა სისტემა კი ისე აქვთ მცენარეებს განვითარებული, რომ წლის ნებისმიერ პერიოდში შეიძლება მათი დარგვა.
ბათუმის გამწვანებისა და ლანდშაფტური დაგეგმარების სამსახურმა ხებუჩქოვანი მცენარეების შესაძენად ტენდერი 200 ათას ლარზე გამოაცხადა. მეორე ტენდერში გამარჯვებული კომპანია „ვანის სათბურები“ კი ნერგებს 165 ათას ლარად მიაწვდის.
ჯამში 1320 ძირი ხებუჩქოვანი მცენარის შეძენაა გათვალისწინებული. მათ შორისაა 50 ძირი საკურა. ერთი ძირი საკურას ფასი, სატენდერო წინადადების თანახმად, 117 ლარი და 55 თეთრია. 50 ძირი საკურას შესაძენად სულ 5875 ლარი დაიხარჯება.
იმ მცენარეებიდან, რომლებსაც წელს ბათუმში დარგავენ, ყველაზე ძვირადღირებულია მაგნოლია დიდყვავილა – 281 ლარი; კამელიები – 271-262 ლარი და წითელი ნეკერჩხალი – 231 ლარი.
