ციხისძირი-ბობოყვათის გზაზე ძველი ხიდის დემონტაჟი არ უკავშირდება ბიძინა ივანიშვილის პარკისთვის ხის გადატანას – აცხადებენ საქართველოს რკინიგზაში. ორგანიზაციის საზოგადოებასთან ურთიერთობის სამსახურის უფროსის, დაჩი ცაგურიას თქმით, ეს დაგეგმილი სამუშაო იყო:
„გუშინ [20 აპრილს] მიმდინარეობდა სამუშაოები. აქ იყო ძველი ხიდი, რომლის შემცვლელი, ახალი ხიდი აშენდა და გაეშვა ექსპლოატაციაში, ძველი ხიდის დემონტაჟი იყო საჭირო, გამოვაცხადეთ ტენდერი და ტენდერში გამარჯვებულმა კომპანიამ დაიწყო დემონტაჟი. ძველი ხიდი წარმოადგენდა პრობლემას, არაგაბარიტული იყო, ხელს უშლიდა ქვემოდან მიმავალ მანქანებს, ამიტომ მოხდა მისი დემონტაჟი. ამ დროისთვის ეს ხიდი არ მუშაობდა. ორ წელზე მეტია ახალ ხიდზეა გადაყვანილი მოძრაობა“.
იმის შესახებ, რომ ხიდის დემონტაჟი მრავალწლოვანი ხეების გადატანას უკავშირდება, მოქალაქეები ფეისბუქში წერენ.
„საქართველოს რკინიგზა“ ამ თემაზე განცხადების გაკეთებას გეგმავს.
ხიდი. 2017 წლის იანვარი. თედო ჯორბენაძის ფოტო
