“ნახეთ, აბა, ბოთლებზე,თქვენს მაგიდაზე რაც დევს, აღმოაჩენთ თუ არა მარკირების ნიშანს,”- მიმართა საკონსტიტუციო სასამართლოს მეორე კოლეგიას მოსარჩელე კომპანიების ინტერესების დამცველმა. სასამართლო განიხილავს არის თუ არა არააქციზური პროდუქტისთვის მარკირების გადასახადის დაწესება კონსტიტუციური.
კომპანიები: “კოკა-კოლა ბოთლერს ჯორჯია”, “აიდიეს ბორჯომი ბევერიჯიზ კომპანი”, “წყალი მარგებელი” და “კასტელ ჯორჯია” საგადასახადო კოდექსის, ასევე ფინანსთა მინისტრის ბრძანების მიხედვით დადგენილ “სავალდებულო მარკირებას” აპროტესტებენ. ეს წესი გასული წლის იანვრიდან ამოქმედდა.
მოსარჩელე მხარე ხაზს უსვამს იმასაც, რომ სახელმწიფომ გადაწყვეტილება ფინანსური დასაბუთების გარეშე მიიღო. კომპანიების წარმომადგენლებმა სასამართლო პროცესზე თქვეს, რომ ამ კუთხით გადასახადის რაოდენობა წლის განმავლობაში მილიონ ლარს აღწევს.
კომპანიების აზრით, “სავალდებულო მარკირება” არღვევს საქართველოს კონსტიტუციით გარანტირებულ საკუთრების უფლებას, ასევე აფერხებს თავისუფალი მეწარმეობისა და კონკურენციის განვითარებას.
სარჩელი საკონსტიტუციო სასამართლომ დღეს არსებითად განიხილა.
