Batumelebi | ბათუმის მუსიკალური ცენტრის ახალი პროექტები ბათუმის მუსიკალური ცენტრის ახალი პროექტები – Batumelebi
RU | GE  

ბათუმის მუსიკალური ცენტრის ახალი პროექტები

ბათუმის მუსიკალური ცენტრი ახალი პროექტების განხორციელებას იწყებს. ესენია – „დებიუტი“, „საუბრები ოპერაზე“ და „ავსტრიულ-ქართული პროექტი“. ბათუმის მუსიკალური ცენტრის პრესსპიკერის, სალომე ცეცხლაძის განმარტებით, პროექტები საოპერო ჟანრის უკეთ განვითარებას ითვალისწინებს.

„სიახლეა ის, რომ უფრო მეტი ყურადღება მიექცევა საოპერო ჟანრს და ხელოვნების სასწავლო უნივერსიტეტის სტუდენტებიც „დებიუტის“ ფარგლებში აქტიურად იქნებიან ჩართული ამ პროცესში. სტუდენტებს შეუძლიათ ფართო აუდიტორიის წინაშე წარსდგნენ  და შემდეგ უკვე საოპერო დასშიც გადაინაცვლონ როგორც სოლო შემსრულებლებმა.

„დებიუტის“ ფარგლებშია პირველი კონცერტი, რომელიც 20 თებერვალს გაიმართება,  იმღერებენ სტუდენტებიც და მათ პარტნიორობას გაუწევენ ბათუმის მუსიკალური ცენტრის საოპერო დასის მოქმედი სოლისტები“.

„საუბრები ოპერაზე“, სალომე ცეცხლაძის თქმით, სალონური საღამოების ფორმატში თვეში ერთხელ გაიმართება, – საოპერო ჟანრში მოღვაწე მუსიკოსები ოპერაზე, როგორც ჟანრზე და დღეს მიმდინარე პროცესებზე ისაუბრებენ.

10 იანვარს გაფორმდა მემორანდუმი მუსიკალურ ცენტრსა და „ავსტრიულ-ქართულ თეატრს“  შორის, რომელიც ითვალისწინებს კულტურული პროექტების ტურიზმის განვითარებას და ერთობლივი კულტურული ღონისძიებების ჩატარებას როგორც ბათუმში, ასევე ვენაში.

„პირველი კონცერტი ავსტრიას ექნება ბათუმში, ჩვენ გვინდა, რომ ავსტრიაში აქედან ტექნიკური პერსონალი წავიდეს, რადგან ტექნიკური პერსონალი მოიკოჭლებს ჩვენთან და მემორანდუმის ფარგლებში მოეწყობა გამოფენები, შემოქმედებითი საღამოები და გვექნება კონპროდუქციაც,“-ამბობს სალომე ცეცხლაძე.

მისი თქმით, სამივე პროექტი მუსიკალური ცენტრის ბიუჯეტით განხორციელდება და დამატებით თანხა არ დაიხარჯება.

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com