Batumelebi | სახლების ჩამონგრევაზე ენმ პასუხისმგებლობას თვითმმართველობას აკისრებს სახლების ჩამონგრევაზე ენმ პასუხისმგებლობას თვითმმართველობას აკისრებს – Batumelebi
RU | GE  

სახლების ჩამონგრევაზე ენმ პასუხისმგებლობას თვითმმართველობას აკისრებს

ენმ ფერიაში მომხდარ ტრაგიკულ შემთხვევაზე პასუხისმგებლობას ხელვაჩაურის თვითმმართველობას აკისრებს, ამის შესახებ ენმ-ს წევრმა მიშა ბოლქვაძემ ცოტა ხნის წინ ბრიფინგზე ისაუბრა. „2014 წლის მეათე თვეში მაშინდელმა, იგივე დღევანდელმა უმრავვლესობამ მხარი არ დაუჭირა ერთიანი ნაციონალური მოძრაობის მიერ წარმოდგენილ მიზნობრივ პროგრამას, სოციალურად დაუცველი (57 000 ქულამდე) ოჯახების საკუთრებაში არსებული სახლების, ავარიული სახურავების მოწყობის შესახებ. ჩვენ მოვითხოვთ უახლოეს პერიოდში ჩატარდეს საკრებულოს სხდომა და განმეორებით შევალთ ამ განკარგულებით,” – ამბობს მიშა ბოლქვაძე.

ხელვაჩაურის გამგებელი ნადიმ ვარშანიძე ენმ-ს ბრალდებას უარყოფს და ამბობს, რომ ხელვაჩაურის მუნიციპალიტეტში 2014-2015 წლებში, დაახლოებით 100 სოციალურად დაუცველ ოჯახს გადაეცა ე.წ. შიფერი, მათ საკუთრებაში არსებული სახლების სახურავების გასამაგრებლად. „პირიქით, ეს ნაციონალური მოძრაობის ლიდერები აპროტესტებდნენ ჩვენ მიერ მოსახლეობაზე “შიფერების” გადაცემას, კონტროლის პალატაში ჩიოდნენ და თანხების არამიზნობრივ ხარჯვაში გვადანაშაულებდნენ.

ხელვაჩაურის მუნიციპალიტეტში 17 000 სახლი დგას, რომელთა უმრავლესობაც 60-იან წლებშია აშენებული. ნადიმ ვარშანიძის განმარტებით, მოძველებული სახლების გამაგრებისთვის, მათი სიმრავლის გამო, მუნიციპალიტეტი ცალკეულ პროგრამას ვერ ახორციელებს, თუმცა – „მაქსიმალურად ვეხმარებით მიწისძვრის, ზვავების და სხვა სტიქიური უბედურებების შედეგად დაზარალებულ ოჯახებს.

ოჯახი, რომლის სახლიც ახლა დაინგრა, არ არის სოციალურად დაუცველი. რაც შეეხება ფერიაში დაზარალებულ ოჯახს, ჩვენ შარშან გაცემული გვაქვს 7750 ლარი სახლის გამაგრების მიზნით და გავუმაგრეთ კიდეც სახლი. საქმე ის არის, რომ მეორე ძმას აუშენებია უნებართვოდ ფიცრული, რომელიც თოვლმა  დაუნგრია. დიდი თოვლის დროს, უნდა მოხდეს ამ სახლების გადმოთოვლა, ამაში გამგეობა ვერ გაუწევს დახმარებას ოჯახებს,” – განმარტავს ხელვაჩაურის მუნიციპალიტეტის გამგებელი.

 

ნეტგაზეთის მასალების სხვა გამოცემებში გადაბეჭდვის წესი
ავტორი
ია ფრანგიშვილი არის გაზეთ "ბათუმელების" რეპორტიორი 2014 წლიდან