ქობულეთის გამგეობის პრესსამსახურის ინფორმაციით, დიდთოვლობის გამო ქობულეთი-ოზურგეთის მიმართულებით გადაადგილება ამ დროისთვის შეფერხებულია და მოძრაობა მხოლოდ მაღალი გამავლობის ავტომანქანებითაა რეკომენდებული; რაც შეეხება ბათუმი-ქობულეთის ცენტრალურ მაგისტრალს, იყო შეფერხებები, თუმცა სატრანსპორტო მიმოსვლა უკვე აღდგენილია.
„თოვლის საფარი ქალაქში 40 სანტიმეტრია, მაღალმთიან სოფლებში კი 60-70სანტიმეტრს აღწევს. სტიქიასთან ბრძოლის შტაბი საგანგებო რეჟიმში მუშაობს. მობილიზებულია სამაშველო ჯგუფები და ელექტრიკოსთა ბრიგადები. მუნიციპალიტეტში 11 ერთეული სპეცტექნიკა მუშაობს. იწმინდება ცენტრალური გზები როგორც ქალაქის ტერიტორიაზე, ასევესოფლების მიმართულებით“ – აცხადებენ გამგეობაში.
შეზღუდვებია ელექტროენერგიის მიწოდებაშიც. ამ დროისთვის 5 ათასამდე აბონენტს ელექტროენერგია არ მიეწოდება დაბა ჩაქვის, ხალას, ჩაისუბნის, კვირიკეს, დაბა ოჩხამურისა და ემტეესის დასახლებაში. „მიმდინარეობს დაზიანებული ელექტროგადამცემი ხაზების აღდგენითი სამუშაოები. სინოპტიკოსების პროგოზით კი ქობულეთში უამინდობა კიდევ ორ დღეს შენარჩუნდება.“ – აცხადებენ გამგეობაში.