აჭარის ჯანდაცვის სამინისტროს წარმომადგენლები 2013 წლის მიზნობრივ პროგრამებსა და სამინისტროს 2012 წლის მუშაობის ანგარიშს ხვალ, 24 იანვარს ხელვაჩაურისა და ქედის მუნიციპალიტეტების გამგეობებისა და საკრებულოების ჯანმრთელობისა და სოციალური დაცვის სამსახურების წარმომადგენლებს, თემის რწმუნებულებს, პირველადი ჯანდაცვის რგოლის ექიმებსა და მუნიციპალიტეტში მოქმედ სამედიცინო დაწესებულებების თანამშრომლებს წარუდგენენ.
სამინისტროს წლის პროგრამული ბიუჯეტი 5 818 700 ლარია, აქედან 5 397 300 ლარი ჯანმრთელობის დაცვის პროგრამებზე, ხოლო 421 400 ლარი სოციალური დაცვის პროგრამებზე ნაწილდება.
სამინისტრო წელს პირველად ახორციელებს სმენადაქვეითებულ მოქალაქეთა სმენის აპარატებით უზრუნველყოფის, მიუსაფარ დედათა და ბავშვთა თავშესაფრით უზრუნველყოფის და მაღალმთიან მუნიციპალიტეტებში სამედიცინო პერსონალის მატერიალური წახალისების პროგრამას.
წლის მიზნობრივი პროგრამების პრეზენტაცია ქობულეთის მუნიციპალიტეტში 25 იანვარს გაიმართება.
მუნიციპალიტეტში დაგეგმილ შეხვედრებს მინისტრი ნუგზარ სურმანიძე, მინისტრის მოადგილეები და სამინისტროს საქვეუწყებო დაწესებულების დირექტორები დაესწრებიან.
მომზადებულია პრესრელიზზე დაყრდნობით
