ქობულეთის გამგეობის თანამშრომლების თქმით პოლიცია გამგებლის სასწრაფოდ გადადგომის მოთხოვნით გამგეობაში შეჭრილ პირებთან მოლაპარაკებებს აწარმოებს. ადგილზე იმყოფება აჭარის პოლიციის უფროსი ვალერი თელიაც. მისი თქმით, ამ დროისათვის ქობულეთის გამგეობაში უცხო პირები აღარ იმყოფებიან. უშუალოდ ვისი ორგანიზებით და ვინ შეიჭრა ქობულეთის გამგეობის შენობაში, დაიწყება თუ არა ინციდენტის მოკვლევა – ამ საკითზებზე პასუხისათვის ვალერი თელიამ შსს პრესსამსახურში გადაგვამისამართა.
შეგახსენებთ, რომ ქობულეთის გამგეობის შენობაში დღეს 100-150 -მდე ადამიანი შეიჭრა გამგებლის, თენგიზ ზოიძის გადადგომას მოთხოვნით.
ქობულეთის საკრებულოს თავმჯდომარის, ელგუჯა ბაგრატიონის თქმით გამგეობის შენობაში გამგებლის გადადგომას „ქართული ოცნების” მხარდამჭერები ითხოვდნენ. საკრებულოს თავმჯდომარის თქმით, არ არ უთქვამთ გამგებლის პოსტზე ვისი დანიშვნა უნდოდათ.
ანზორ თხილაიშვილმა, უმაღლეს საბჭოში ქობულეთის მაჟორიტარი დეპუტატი „ქართული ოცნებიდან” „ბათუმელებთან“ განაცხადა, რომ ინციდენტის შესახებ იცის, თუმცა ეს მისგან დამოუკიდებლად ხდება: „აბსოლუტურად დამოუკიდებლად ხდება ეს ყველაფერი, არ ვიცი ვისი ორგანზიებით, არა ვარ საქმის კურსში. არ ვაპირებ ამ პროცესებში ჩარევას, ვემიჯნები ამ პროცესებს. ჩემი აზრით ეს არის კანონდარღვევა.”
