Batumelebi | ვინ განიხილება აჭარის განათლების მინისტრის პოსტზე ვინ განიხილება აჭარის განათლების მინისტრის პოსტზე – Batumelebi

ვინ განიხილება აჭარის განათლების მინისტრის პოსტზე

„ბათუმელების“ ინფორმაციით, აჭარის განათლების მინისტრის პოსტზე, რუსთაველის სახელობის უნივერსიტეტის პრორექტორის, ინგა შამილიშვილის კანდიდატურა განიხილება. ინფორმაციას გვიდასტურებს ინგა შამილიშვილიც.

„კი განიხილება ჩემი კანდიდატურა. ჯერ გადაწყვეტილი არ არის, განხილვის პროცესშია“. განიხილება თუ არა მისი კანდიდატურის გარდა სხვა კანდიდატურებიც, ინგა შამილიშვილი ამბობს, რომ ამ ინფორმაციას არ ფლობს.

მიმდინარე წლის ივნისში ინგა შამილიშვილს უნივერსიტეტში გამოფენილი რუსული დროშის გამოც მოუხდა პასუხის გაცემა.

განათლების მინისტრის მოადგილეების პოსტებზე, უმაღლესი საბჭოს ყოფილი წევრის, მხატვარ აკაკი ძნელაძისა და აჭარის საარქივო სამმართველოს უფროსის, მაკა ივანიშვილის კანდიდატურები განიხილება.

„კი, არის ეგ ინფორმაცია ზუსტად, უბრალოდ, ჩემი გადასაწყვეტია რა და როგორ, რადგან ეს არის ძალიან საპასუხისმგებლო თანამდებობა, რადგან მე არ ვარ ადამიანი რომელიც მხოლოდ ბიუროკრატიულად ადგილს ეძებს, მე მინდა საქმე ვაკეთო. ამიტომ, რამდენად შეიძლება ყველაფერი შევათავსო, ეს არის ჩემი გადასაწყვეტი“-გვეუბნება აკაკი ძნელაძე.

„ბათუმელების“ კითხვაზე, – რომელ საქმეს გულისხმობთ, რომელსაც თქვენი აზრით საჯარო მოხელეობას ვერ შეუთავსებთ, აკაკი ძნელაძე გვპასუხობს: „პროფესიულ საქმეს მე ყოველთვის ვუთავსებ, უბრალოდ რაც არის იდეაში, რაც თავში მაქვს, რამდენად იქნება შესაძლებელი, ამ ყველაფრის თუ არა 70 პროცენტის მაინც გაკეთება. კულტურას, ხელოვნებას განვითარება სჭირდება და ეს ყველაფერი აუცილებლად უნდა გაიყიდოს დასავლეთშიც, სხვაგვარად ჩვენი შემოქმედებითი ყოფა კითხვის ნიშნის ქვეშ იქნება. ამას ვფიქრობ, რამდენად შესაძლებელია ამის გაკეთება მოადგილის პოსტზე. ბევრჯერ უნდა აწონო-დაწონო და ეგ არის“.

აკაკი ძნელაძე ამბობს, რომ მოფიქრებისთვის მას მხოლოდ ერთი-ორი დღე აქვს.

ინფორმაციის დაზუსტების მიზნით, აჭარის მთავრობასაც მივმართეთ. „დადასტურებით ვერაფერს გეტყვით, მხოლოდ ის შეგვიძლია გითხრათ, რომ მიმდინარეობს კონსულტაციები“ – გვეუბნება პრესსამსახურის უფროსი, სოფო გუჯაბიძე. თუმცა რამდენ პირთან მიმდინარეობს კონსულტაცია, არ აზუსტებს.

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com