„ნაციონალური მოძრაობის“ წევრის რეზო ხარაზის განცხადებით, ქობულეთის მუნიციპალიტეტში 2016 წელს დაწყებულ სამ ობიექტზე სამუშაოები არასათანადოდ შესრულდა, თანხები კი გადახდილია. მისი თქმით, ამ სამუშაოებით საგამოძიებო ორგანოები უნდა დაინტერესდნენ.
„ჩვენ საკრებულოს წევრებთან ერთად გამოვითხოვეთ 2016 წელს დაწყებული ინფრასტრუქტურული პროექტების დოკუმენტაცია, რომელიც ხელშეკრულებების მიხედვით, ამ დროისთვის უნდა იყოს დასრულებული. სამი მსხვილი ობიექტის მაგალითზე ჩვენ შეგვიძლია ვთქვათ, რომ ეს პროექტები ჯერ კიდევ არ დასრულებულა და რაც გაკეთდა, ის სამუშაოებიც არასათანადოდ არის შესრულებული“ – აცხადებს რეზო ხარაზი.
მისივე ინფორმაციით, გელაურის საკანალიზაციო სისტემების რეაბილიტაცია ამ დრომდე უნდა დასრულებულიყო, თუმცა სისტემა ისევ არ არის ჩართული: „სამუშაოები 200 ათასი ლარი დაჯდა, პრაქტიკულად უნდა მუშაობდეს სისტემა. სატუმბ სადგურზე ვიყავით გასული და საშენი მასალებით არის ავზები გავსებული“.
რეზო ხარაზის თქმით, შემდეგი პროექტი არის ავტოსადგური, რომლის რეაბილიტაციაც მუნიციპალიტეტის ბიუჯეტიდან 520 ათასი ლარით დაფინანსდა, თუმცა სამუშაოები არ შესრულდა: „გამგეობაში გვეუბნებიან რომ სამშენებლო კომპანიას ხელშეკრულება შეუწყვიტეს. რატომ, რა მიზეზით, პასუხი არ აქვთ. ვიზუალურადაც რომ შეხედოთ, მიხვდებით რომ სამუშაოები არ არის დასრულებული. სადგურში დიდი ორმოებია დღემდე. მოვითხოვეთ სამხარაულის ექსპერტიზის დასკვნები, თუმცა არ მოგვაწოდეს, რომ გავიგოთ ამ ობიექტებზე რა დარღვევებია“.
რეზო ხარაზის თქმით, მიუხედავად იმისა რომ ობიექტებზე სამუშაოები არ დასრულებულა, მიღება-ჩაბარების აქტები მაინც არსებობს.
„მესამე ობიექტი არის ორი მინი ფეხბურთის სტადიონი, რომელიც ფიჭვნარში გააკეთეს და რომელიც დაახლოებით 600 ათას ლარამდე დაჯდა, მიღება-ჩაბარების აქტი 17 ოქტომბრით არის დათარიღებული, მაშინ როცა ამ სტადიონებზე კატასტროფული მდგომარეობაა და თავიდან ბოლომდეა გასაკეთებელი და ეს საქმე სხვა უწყების გამოსაძიებელია“ – აცხადებს რეზო ხარაზი.
ქობულეთის გამგებელი სულხან ევგენიძე „ბათუმელების“ ზარებს არ პასუხობს. მის კომენტარს მოგვიანებით შემოგთავაზებთ.
