Batumelebi | ანგრევენ სახლს, რომლის გადარჩენასაც „ბათომი” ითხოვდა ანგრევენ სახლს, რომლის გადარჩენასაც „ბათომი” ითხოვდა – Batumelebi
RU | GE  

ანგრევენ სახლს, რომლის გადარჩენასაც „ბათომი” ითხოვდა

ბათუმში დაიწყეს ისტორიული სახლის დემონტაჟი, რომლის გადარჩენასაც საზოგადოება „ბათომი” ითხოვდა.

“ბათომის“ განცხადებით, რომელიც კულტურული მემკვიდრეობის საკითხებზე მომუშავე ერთადერთი არასამთავრობო ორგანზიაციაა აჭარაში, აღნიშნული შენობა ისტორიულია, იგი მე-19 საუკუნის 80-იან წლებშია აგებული და ქალაქის ისტორიული განაშენიანების ღირებული ნაწილია. გარდა ამისა, შენობა მოქცეულია ორი ძეგლის ვიზუალური დაცვის არეალში და მის ადგილას მრავალსართულიანი შენობის აგება გამოიწვევს ისტორიულად ჩამოყალიბებული გარემოს განადგურებას.

ასევე, ორგანიზაციის განცხადებით, შენობას 2008 წელს საქართველოს კულტურისა და ძეგლთა დაცვის მინისტრის ბრძანებით [ბრძ.#3/165] მინიჭებული ჰქონდა კულტურული მემკვიდრეობის ძეგლის სტატუსი, თუმცა, 2016 წლის 13 აპრილს ამ ბრძანებაში შევიდა ცვლილება, რომლის მიხედვითაც ძეგლის სტატუსი მიენიჭა ფარნავაზ მეფის #51-ში მდებარე შენობას, რომელსაც ისედაც ჰქონდა ძეგლის სტატუსი.

„გვაქვს სერიოზული ეჭვი, რომ ფარნავაზ მეფის #57-ში მდებარე შენობისთვის ძეგლის სტატუსის მოსახსნელად გამოყენებული იყო თაღლითური სქემა მისამართების მანიპულირებით“ – ამ განცხადებით “ბათომმა” გასულ კვირას მთავრობის თავმჯდომარეს, ზურაბ პატარაძეს მიმართა. 

როგორც „ბათუმელებს“ ქალაქის მერიის პრესსამსახურში უთხრეს, დემონტაჟის ნებართვა ქალაქის მერიამ გასცა.

როინ გუნდაძის ფოტო

როინ გუნდაძის ფოტო

 

ნეტგაზეთის მასალების სხვა გამოცემებში გადაბეჭდვის წესი
ავტორი
გაზეთი "ბათუმელები" გამოდის 2001 წლიდან.