2011 წლის 30 დეკემბრითვე თარიღდება საკრებულოს მეორე განკარგულებაც, რომლითაც უკვე სტატუსშეცვლილი თავისუფლების მოედანი საკრებულომ აჭარის მთავრობას უსასყიდლოდ გადასცა. გადაწყვეტილების მიღების მიზეზად განკარგულებაში აჭარის ფინანსთა და ეკონომიკის სამინისტროს მოთხოვნაა დასახელებული.
2011 წლის 19 დეკემბერს ბათუმის მერიას წერილით მიმართა აჭარის ფინანსთა და ეკონომიკის სამინისტრომ, სადაც აღნიშნული იყო, რომ სამინიტრო ბათუმში, ზ. გამსახურდიას და მ.აბაშიძის ქუჩების კვეთაში (დრამატული თეატრის მიმდებარე ტერიტორია) თვითმმართველი ქალაქ ბათუმის საკუთრებაში არსებულ არასასოფლო სამეურნეო დანიშნულების მიწის ნაკვეთის პრივატიზებას გეგმავდა, რის გამოც საკრებულოს აღნიშნული ტერიტორიის აჭარის მთავრობისათვის საკუთრების უფლებით გადაცემა მოითხოვა. სწორედ ამ წერილის საფუძველზე ბათუმის საკრებულომ მიიღო გადაწყვეტილება და მითითებულ მისამართზე არსებული 2 902 კვ/მ არასასოფლო სამეურნეო დანიშნულების ნაკვეთი მთავრობას უსასყიდლოდ, თუმცა გარკვეული პირობებით გადასცა. პირობების ერთერთ პუნქტში კი ნათქვამი იყო, რომ უსასყიდლოდ გადაცემულ ქონებაზე აჭარის ავტონომიურ რესპუბლიკას საკუთრების უფლება შეუწყდებოდა თუ იგი არ მოახდენდა მის პრივატიზებას. სხვა შემთხვევაში ამ ქონებაზე საკუთრების უფლება ისევ ბათუმის საკრებულოს უნდა დაბრუნებოდა.
მოგვიანებით აღნიშნული ტერიტორია აჭარის ფინანსთა და ეკონომიკის სამინისტრომ სიმბოლურ ფასად „სისტემ ინშაათს“ გადასცა, კომპანიას მაღალ სართულიანი სასტუმრო კომპლექსი უნდა აეშენებინა, თუმცა შეთანხმება ჩაიშალა. კომპანიამ გაურკვეველი მიზეზით სასტუმროს მშენებობაზე უარი თქვა. ეს ინფორმაცია „ბათუმელებს“ ფინანსთა და ეკონომიკის მინისტრმა დაუდასტურა, ვაჟა ბოლქვაძის თქმით „მართალია სისტემ ინშაათი მითითებულ ტერიტორიაზე სასტუმროს აღარ ააშენებს, მაგრამ საკრებულოს პირობა ტერიტორიის პრივატიზების შესახებ შესრულებული იქნება“. მინისტრმა ჩვენთან საუბარში არ დააკონკრეტა, თუ როგორ და რა ვადებში აპირებს სამინისტრო ქონების ხელმეორედ პრივატიზებას. საკრებულოს ოპოზიციური ფრაქცია კი კანკარგულებაში ჩადებული პუნქტის თანახმად ტერიტორიის უკან დაბრუნებას და გმირთა სკვერზე ძველი სტატუსის დაბრუნებას ითხოვს, ბრიფინზე დღეს მათ სამინისტროსთან დადებული შეთანხმების გარდა გმირთა საფლავზე მონუმეტის განთავსების მიზნით 1990 წელს გამოცხადებულ კონკურსში გამარჯვებული პროექტი, არქიტექტორ გიორგი რამიშვილის მიერ მომზადებული ეკვდერის ესკიზებიც წარმოადგინეს და მისი განხორციელების სურვილი გამოთქვეს.
