ჩაქვში, ბათუმი-ქობულეთის ავტომაგისტრალის მიმდებარედ მრავალწლიან ევკალიპტის ხეებს ჭრიან. ქობულეთის მუნიციპალიტეტის გამგეობის პრესსამსახურის ინფორმაციით, აღნიშნულ ტერიტორიაზე გამგეობის მიერ გაცემულია 8 ძირი ევკალიპტის მოჭრის ნებართვა და სამუშაოები მიმდინარეობს.
„ხეებს ენერგოკომპანია ჭრის. გამგეობამ ნებართვა გასცა მიმდინარე წლის 23 სექტემბერს, „ენერგო-პრო ჯორჯიას“ მომართვის საფუძველზე. აღნიშნული ხეები საფრთხეს წარმოადგენდა იქ არსებული ელექტროგადამცემი ხაზებისთვის. მერქანი დასაწყობდება და გამგეობა მას სოციალურად დაუცველ ოჯახებს გადასცემს [შეშად]“ – განაცხადეს ქობულეთის გამგეობის პრესსამსახურში.
ჩაქვი. მოჭრილი ევკალიპტები. 22.11.2016 / არჩილ კახაძის ფოტო
მრავალწლიანი ევკალიპტი ცოტა ხნის წინ მოჭრეს გონიოშიც. როგორც შემდეგ „ბათუმელებმა“ გაარკვია, ევკალიპტების ადგილზე კერძო კომპანია ტრაილერების ავტოსადგომის მოწყობას გეგმავს.
