დღეს, 19 მარტს, მოსამართლე თამარ ბეჟანიშვილმა ხელვაჩაურში ჩატარებული სპეცოპერაციის დროს ერთ სოფელში – შარაბიძეებში დაკავებულ 30 პირი წინასწარი პატიმრობა შეუფარდა. ერთ ბრალდებულს, რომელიც საქართველოში არაა, პატიმრობა დაუსწრებლად შეეფარდა, ქალ ბრალდებულს კი, მოსამართლემ საპატიმრო გირაო შეუფარდა – 7 ათასი ლარი გირაოს გადახდის შემდეგ, ქალი ბრალდებული გათავისუფლდება.
ამ საქმეზე სულ 77 ბრალდებულია. სხვა დაკავებულების საქმე თბილისის საქალაქო სასამართლოში განიხილება. ბრალდებულებს გამოძიება „ქურდული სამყაროს“ წევრობას, ქურდულ შეკრებაში მონაწილეობას, ან „ქურდული სამყაროს“ მხარდაჭერას ედავება.
საუბარია 17 მარტს მომხდარ შემთხვევაზე – სპეცოპერაციის შედეგად 72 პირი დააკავეს, მათ შორის 3 ქალი „ქურდულ სამყაროსთან“ კავშირის ბრალდებით. კიდევ 5 პირს ბრალი დაუსწრებლად წარუდგინეს. სპეციპერაციის დროს დაშავდა ქალი – თამარ მიქელაძე ამბობს, რომ მას სპეცრაზმელმა ფეხში ესროლა.
შსს-ს ვერსიით, ბრალდებულები აწყობდნენ ქურდულ გარჩევებს და გამოჰქონდათ ე.წ. ქურდული გადაწყვეტილებები. „დაკავებულები უკავშირდებოდნენ „კანონიერ ქურდს“, ასლან ქობულაძეს და პირადი სარგებლის მიღების მიზნით, მოქალაქეებს შორის არსებული ფინანსური და კრიმინალური სახის დავებზე იღებდნენ გადაწყვეტილებებს, რის შემდეგაც მხარეებს თანხის გადახდას აკისრებდნენ. კონკრეტული ვადების დარღვევის შემთხვევაში კი, ფიზიკური ანგარიშსწორებითა და სიცოცხლის მოსპობით ემუქრებოდნენ“, – ამბობს „ქართული ოცნების“ შს მინისტრი გელა გელაძე.
15 ბრალდებულის საქმის განხილვა დღეს, 19 მარტს, დაახლოებით დღის 2 საათზე დაიწყო მოსამართლემ. მოსამართლის შემოსვლამდე ბადრაგებმა 11 ბრალდებული გისოსებით შემოსაზღვრულ კაბინაში მოათავსეს, 4 ბრალდებული კი, ადვოკატების ზურგს უკან დასვეს სპეციალურად მათთვის განლაგებულ სკამებზე პოლიციელებს შორის.
პროკურორმა ლაშა ლოლუამ თავის სიტყვაში ხაზი გაუსვა იმას, რომ გირაოთი ბრალდებულების გათავისუფლება საფრთხეა, რადგან დანაშაულებრივი საქმიანობის გაგრძელების საფრთხე არსებობს.
„აქ არიან ერთმანეთზე დაპირისპირებული მხარეებიც…“ – დასძინა პროკურორმა ლაშა ლოლუამ და ყურადღება გაამახვილა მტკიცებულებების განადგურების რისკზე. მან ბრალდებულებისთვის პატიმრობის შეფარდების შუამდგომლობით მიმართა მოსამართლეს.
„ენრიკე ტაქსისტია და ამით ირჩენს თავს. ბიჭებო, თქვენ მიგმართავთ: შეიძლება, ტაქსისტი ქურდული სამყაროს წევრი იყოს?“ – გისოსებში გამომწყვდეულ, ფეხზე მდგომ ბრალდებულებს მიმართა ადვოკატმა ირაკლი ფაღავამ და ვიდრე ორი ბრალდებულის გათავისუფლებას ითხოვდა იქვე 10 ათასი ლარი გირაოს სანაცვლოდ, იგი მოსამართლემ შეაჩერა:
„მესაუბრებით მხოლოდ მე“ – თქვა მოსამართლემ.
ადვოკატის თქმით, მისი დაცვის ქვეშ მყოფს ქურდული სამყაროს წევრისთვის თანხის 500 ლარის ჩარიცხვას ედავებიან, სინამდვილეში კი მას რეალურად ჰქონდა ვალი გადასახდელი.
კიდევ ერთმა ადვოკატმა ემზარ პაქსაძემ, ბრალდებულების კოლექტიური გასამართლება გააპროტესტა. „კოლექტიური მართლმსაჯულება არ იძლევა კვალიფიციური დაცვის საშუალებას“, – თქვა მან.
სხვა ადვოკატებისგან განსხვავებით ტრიბუნასთან მისვლა არჩია ადვოკატმა პაატა შავაძემ:
„მოსალოდნელ, მკაცრ სასჯელზე მითითება პირდაპირ მოდის წინააღმდეგობაში ადამიანის უფლებათა დაცვის ევროპულ სასამართლოს პრაქტიკასთან“, – თქვა მან და ყურადღება გაამახვილა იმაზეც, რომ ბრალდებულ რეზო მ.-ს სპეცოპერაციის დროს გაქცევა არ უცდია.
ადვოკატმა სიმონ ასათიანმა კი მოსამართლეს უთხრა, რომ მისი დაცვის ქვეშ მყოფი საერთოდ არ ფიგურირებს სატელეფონო ჩანაწერში, კონკრეტული ფაქტი არ აქვს მითითებული პროკურატურას და გაუგებარია, რას ედავებიან ბრალდებულს.
„ყველას ერთ ქვაბში მოხარშვა და შეწვა არ იქნება სწორი,“ – დასძინა ადვოკატმა თენგიზ კახიძემ.
„ბრალის შესახებ დადგენილება დასაბუთებული ვარაუდის სტადარტსაც ვერ აკმაყოფილებს“ – მოსამართლეს გახედა ადვოკატმა ქეთი ადამიამ და იქვე დასძინა, რომ პროკურატურა მხოლოდ შაბლონური დასაბუთებით შემოიფარგლა.
„ის, რომ ვიღაც ვიღაცას იცნობს, ეს არ შეიძლება გახდეს პატიმრობის საფუძველი“, – აღნიშნა ადვოკატმა ქეთი ადამიამ.
„ვერ ვნახე მტკიცებულება, რომ ბრალდებულმა ვინმეს მიმართა საერთოდ, არც კრებსია, არც ჩანაწერ ასეთი… მხოლოდ და მხოლოდ პატაკი და პროკურორის მოსაზრება არაა საკმარისი ბრალის წარსადგენად“, – პროკურატურის ვერსია გააპროტესტა ადვოკატმა პაატა ბოლქვაძემაც.
ბრალდებულებს შორის პროცესზე მხოლოდ მირზა მ.-მ გამოხატა პოზიცია: „ჩემი არდაკავება რას შეუშლის ხელს? მე ვეკითხები ბატონ პროკურორს, 35 წლის ასაკში პირველად ვარ აქ, რაღაც პასუხი ხომ უნდა მივიღო?“
ამ ბრალდებულის თქმით, იგი ტურისტული სააგენტოს თანამშრომელია.
„ირიბი მტკიცებულება თუ არის მაინც?“ – ტრიბუნასთან მისვლა არჩია ადვოკატმა ადილარ წირღვავამაც.
შემდეგ კი, პროკურორებს შეკითხვით მიმართა მოსამართლემ. მან ადვოკატების ნათქვამი შეაჯერა: ბრალდება ძირითადად პატაკებს ეყრდნობა და არა მტკიცებულებებსო.
„შეეძლოთ წაეკითხათ კრებსები“, – ადვოკატებს გადახედა პტოკურორმა თემურ გურამიშვილმა.
„ეტყობა, დროის სიმცირის გამო ვერ მიასწრეს საქმის მასალების გაცნობა“, – მოსამართლეს მოკლედ უპასუხა პროკურორმა ლაშა ლოლუამაც.
„ჩვენ, ადვოკატები რა სტრატეგიას ავირჩევთ, ამის მიუხედავად თქვენ ხართ ვალდებული, სასამართლოს განუმარტოთ, რაში ედებათ ბრალი ამ ადამიანებს“, – პროკურორებს გაუბრაზდა ადვოკატი ემზარ პაქსაძე.
იგივე ბრალდებულმა მირზა მ.-მ ითხოვა აქ დამატება:
„სამეზობლოში ხომ იცნობთ ბიჭებს, გოგოებს, შეიძლება, იქ რაღაც გაუგებრობა მოხდეს, შეიძლება, ამის გამო ცხოვრება დამინგრიო?… სულ არაა სასაცილო, თანაც პატრიარქია დაღუპული“, – პროკურორებს მიმართა ბრალდებულმა და გისოსებიდან ხელიც გამოყო.
„აქ თქვენობით მიმართვის ფორმა არსებობს“ – ბრალდებული ისევ მოსამართლემ შეაჩერა.
დაკავებულები უკავშირდებოდნენ „კანონიერ ქურდს“, ასლან ქობულაძეს და პირადი სარგებლის მიღების მიზნით, მოქალაქეებს შორის არსებული ფინანსური და კრიმინალური სახის დავებზე იღებდნენ გადაწყვეტილებებს, რის შემდეგაც მხარეებს თანხის გადახდას აკისრებდნენ. კონკრეტული ვადების დარღვევის შემთხვევაში კი ფიზიკური ანგარიშსწორებითა და სიცოცხლის მოსპობით ემუქრებოდნენ“, – ესეც გეკა გელაძემ განაცხადა.
ამ თემაზე:
