ბათუმის აეროპორტის დაცვის ზონაში დაბრკოლებათა მაქსიმალური დასაშვები სიმაღლეების დასადგენად კვლევას „საქაერონავიგაცია“ ტენდერის გარეშე შეისყიდის.
შესყიდვის სავარაუდო ღირებულება 518 167 ლარს შეადგენს.
კვლევის ერთ-ერთი მიზანი ბათუმის საერთაშორისო აეროპორტისათვის „მორგებული უსაფრთხოების ზედაპირების, მათ შორის სიმაღლის ზონირების შემუშავება“ იქნება, რომელიც უზრუნველყოფს როგორც ფრენების უსაფრთხოებას, ასევე ქალაქის „ურბანული განვითარების მეტ მოქნილობას“.
აღსანიშნავია, რომ სამი თვის წინ საქართველოში ამოქმედდა სამოქალაქო აეროდრომის დაცვის არის დადგენისა და ამ არეში დაბრკოლებების კონტროლის ახალი წესი, რომელიც ვრცელდება როგორც აეროდრომის ექსპლუატანტზე, ისე სააერნაოსნო მომსახურების საწარმოზე – მოცემულ შემთხვევაში, „საქაერონავიგაციაზე“.
„საქაერონავიგაციის“ განმარტებით, მომსახურების გამარტივებული წესით შესყიდვის მიზეზი ამ მიმართულებით გამოცხადებული ტენდერების უარყოფითი შედეგით დასრულებაა.
ვინაიდან მთავრობამ მომსახურების შესყიდვა 2026 წლის ივნისამდე დაავალა, უწყების განცხადებით, ტენდერის გზით პროცედურების დასრულება ამ ვადაში ვეღარ მოხერხდება.
„ელექტრონული ტენდერით ზეოაღნიშნული მომსახურების შესყდვა, შესყიდვის საგნის სპეციფიკიდან გამომდინარე დაკავშირებულია გარკვეულ პროცედურებთან, რაც თავის მხრივ პირდაპირ ბმაშია მომსახურების გაწევის ვადებთან…“ – წერს „საქაერონავიგაცია“ სახელმწიფო შესყიდვების სააგენტოსთან წარდგენილ განაცხადში, რომლითაც გამარტივებულ შესყიდვაზე თანხმობას ითხოვს.
კონკრეტულად, „საქაერონავიგაცია“ შეისყიდის შემდეგ მომსახურებას: ბათუმის აეროდრომის დაცვის არეში არსებული დაბრკოლებების შემზღუდველი ზედაპირების (OLS) მოდიფიკაციის, მორგებული ზედაპირების შემუშავებისა და მაქსიმალური დასაშვები სიმაღლეების განსაზღვრის სააერნაოსნო კვლევას.
განაცხადის მიხედვით, მიმწოდებელმა აღნიშნული კვლევა ხელშეკრულების გაფორმებიდან შვიდი თვის ვადაში უნდა დაასრულოს.
ბათუმის აეროპორტის დაცვის არეში მაქსიმალური დასაშვები დაბრკოლებების სიმაღლეების განსაზღვრაზე „საქაერონავიგაციამ“ ტენდერი პირველად 623 ათას 356 ლარით გამოაცხადა, ხელახალი ტენდერი კი – 523 ათას 367 ლარით.
ამ თემაზე: ბათუმის აეროპორტთან დასაშვები სიმაღლეების დასაზუსტებლად ტენდერი ხელახლა გამოაცხადეს
ბათუმის აეროპორტის დაცვის არეში სიმაღლეების განსაზღვრაზე „საქაერონავიგაციამ“ ტენდერი თავდაპირველად 623 356 ლარით გამოაცხადა, ხელახალი ტენდერი კი – 523 367 ლარით.
ორივე შემთხვევაში მასში მხოლოდ ორი კომპანია მონაწილეობდა, თუმცა ორივე მათგანს ტექნიკური დოკუმენტაციის ხარვეზების გამო დისკვალიფიკაცია მიენიჭა.
პირველ ტენდერში გერმანული კომპანია airsight GmbH მომსახურებას 623 356 ლარად სთავაზობდა, ხოლო თურქული HARİTAEVİ HAVACILIK MÜHENDİSLİK ANONİM ŞİRKETİ – 164 700 ლარად. მეორე ტენდერში კი გერმანული კომპანიის შეთავაზება 518 167 ლარი იყო, თურქულის კი – 517 977 ლარი
დაგეგმილი კვლევის დეტალებზე ვრცლად ნახეთ ამ ბმულზე:
„აეროპორტის დაცვის არე ზღუდავს ბათუმის ურბანულ განვითარებას“ – საქაერონავიგაცია ახალ კვლევას იწყებს
