საპატრულო პოლიციის დეპარტამენტი, „ექსკლუზიური უფლებამოსილების“ საფუძველზე, ტენდერის გარეშე გეგმავს 300 კომპლექტი სამკერდე კამერის შეძენას, რაშიც ჯამში 575 700 ლარს გადაიხდის. ამ შესყიდვის შემდეგ უწყების ბალანსზე არსებული კამერების რაოდენობა 3 560-მდე გაიზრდება.
როგორც დეპარტამენტი სახელმწიფო შესყიდვების სააგენტოსთვის გაგზავნილ მიმართვაში განმარტავს, საჭიროება პირადი შემადგენლობის ზრდამ და დაზიანებული ტექნიკის ჩანაცვლებამ განაპირობა. საუბარია AXON BODY 2 მოდელის კამერებზე. უწყების განმარტებით, ვინაიდან 2018 წლიდან სისტემა სწორედ ამ კომპანიის ინფრასტრუქტურასა და პროგრამულ უზრუნველყოფას იყენებს, სხვა მწარმოებლის აპარატურის ინტეგრირება შეუძლებელია.
„საპატრულო პოლიციის მიერ 2018 წლიდან გამოიყენება და დღეის მდგომარეობით გვაქვს 3 260 ერთეული [აღნიშნული] მოდელის სამკერდე კამერა“ – წერს საპატრულო პოლიციის დეპარტამენტი სახელმწიფო შესყიდვების სააგენტოს, რომლისგანაც გამარტივებული წესით კამერების შეძენაზე თანხმობას ითხოვს.
საპატრულო პოლიცია სამკერდე კამერებს იყიდის / წყარო: შესყიდვების პორტალი
საპატრულო დეპარტამენტის განაცხადის მიხედვით, კამერების მომწოდებელია შპს „ენ ჯი თი ჯგუფი“, რომელიც მწარმოებლის მიერ დადასტურებული ინფორმაციით, AXON-ის ერთადერთი ავტორიზებული დისტრიბუტორია საქართველოში.
აღსანიშნავია, რომ საპატრულო პოლიციამ ამავე კომპანიისგან 2025 წლის მარტშიც შეიძინა 350 კამერა და 200 ლიცენზია, რაშიც 849 500 ლარი გადაიხადა.
„საპატრულო პოლიციის დეპარტამენტში პატრულ-ინსპექტორთა გაზრდილი პირადი შემადგენლობის აღჭურვისა და დაზიანებული კამერების ჩასანაცვლებლად, გვესაჭიროება ოფიცრის სამკერდე კამერების დამატებითი რაოდენობის შეძენა“, – წერდა მაშინაც საპატრულო პოლიციის დეპარტამენტი შესყიდვების სააგენტოს.
ამ თემაზე:
საპატრულო პოლიცია 849 ათასი ლარის სამკერდე კამერებს ყიდულობს – ზრდის პირად შემადგენლობას
