26 დეკემბერს, 14:00-ზე, განათლების სამინისტროსთან „მშობელთა კრება“ გაიმართება.
მშობლების განცხადებით, „ქართული ოცნების“ მიერ დაანონსებული განათლების რეფორმა, ვერ პასუხობს მშობლებისა და ახალგაზრდების ინტერესებსა და გამოწვევებს.
„ქართული ოცნების” მიერ შემოთავაზებული „განათლების რეფორმა” ვერ პასუხობს მოსწავლეების, სტუდენტების, მასწავლებლებისა და ლექტორების წინაშე მდგარ მწვავე პრობლემებსა და საჭიროებებს. დაგეგმილი ცვლილებების გარშემო შეკითხვები მეტია, ვიდრე პასუხები.
ახლა, როცა ჩვენი შვილების მომავალი ბეწვზე ჰკიდია, მშობლები გულგრილი ვერ ვიქნებით. დღეს იმაზე მეტი პასუხისმგებლობა გვაქვს, ვიდრე ოდესმე“, – აცხადებენ მშობლები.
საპროტესტო აქციის ინიციატორები „მშობელთა კრებაზე“ ეპატიჟებიან სტუდენტებს, მასწავლებლებსა და ლექტორებს, რათა გამოთქვან თავიანთი წუხილი და მოსაზრებები განათლების სისტემაში მიმდინარე ცვლილებებზე.
საპროტესტო აქციის ფარგლებში, განათლების სამინისტროს წინ გაიმართება მშობელთა გამოკითხვის შედეგების გაზიარება-პრეზენტაცია, მოწვეული ფსიქოლოგები ისაუბრებენ „ოცნების“ მიერ დაანონსებული რეფორმის ბუნდოვანების გამო წარმოქმნილ სტრესსა და შფოთვაზე მოზარდებში და მათი გამკლავების გზებზე.
იქნება თავისუფალი მიკროფონი – „გააგონე შენი ხმა“.
