ელექტროენერგიის გადასახადი იზრდება. ახალ ტარიფებს სემეკი 2025 წლის 29 დეკემბრის სხდომაზე დაადგენს. რამდენით გაიზრდება დენის გადასახადი, სემეკში ამ ეტაპზე არ აკონკრეტებენ.
„მარეგულირებელი კომისია 29 დეკემბერს კომისიის სხდომაზე დაადგენს ახალ სამომხმარებლო ტარიფებს ელექტროენერგიის სექტორში. ზრდა შეეხება ელექტროენერგიის ტარიფებს. თუმცა დღეს კონკრეტული ციფრის და კონკრეტული ზრდის პროცენტის დასახელება გამიჭირდება, ვინაიდან მარეგულირებელი კომისია ყოველდღიურ რეჟიმში მუშაობს საკითხზე.“ – განაცხადა დღეს, 17 დეკემბერს, დავით ნარმანიამ, საქართველოს ენერგეტიკისა და წყალმომარაგების მარეგულირებელი ეროვნული კომისიის [სემეკის] თავმჯდომარემ.
დავით ნარმანიას განცხადებით, ასევე უნდა გადაიხედოს ბუნებრივი აირის ტარიფებიც, თუმცა „ბუნებრივი აირის ტარიფების ზრდის მოლოდინი და წინაპირობები ამ ეტაპისთვის არ არსებობს, შესაძლოა, ძალიან მინიმალური კორექტირება იყოს“ – თქვა ნარმანიამ.
დამატებითი ინფორმაციის მისაღებად „ბათუმელები“ სემეკს დაუკავშირდა, თუმცა კომისიაში სხვა ინფორმაცია ვერ მივიღეთ.
მარეგულირებელმა კომისიამ ტარიფები ბოლოს 5 წლის წინ დაადგინა და ტარიფების გადათვლა გეგმიური პროცესია. „ტარიფები კანონმდებლობის შესაბამისად და არსებული წესებით დაითვლება და დადგინდება“ – გვითხრეს სემეკში.
