Batumelebi | მოპარული კომპიუტერი, რომელიც დაზარალებულმა სახლში იპოვა მოპარული კომპიუტერი, რომელიც დაზარალებულმა სახლში იპოვა – Batumelebi
RU | GE  

მოპარული კომპიუტერი, რომელიც დაზარალებულმა სახლში იპოვა

მოსამართლე გიორგი გრატიაშვილმა გიორგი კაკაბაძე და ხვიჩა კიწმარიშვილი დამნაშავედ სცნო კერძო საკუთრების ხელყოფაში. ამ პირებს გამოძიება სხვადასხვა ნივთთან ერთად, კომპიუტერის ძარცვას ედავებოდა, რომელიც საბოლოოდ დაზარალებულმა გოგონებმა სახლში აღმოაჩინეს. სასამართლო პროცესების პარალელურად დაკავებულების ახლობლებმა პროკურატურასთან არაერთი საპროტესტო აქცია გამართეს.

საქმის მასალების მიხედვით, ბრალდებულები შეიჭრნენ სხვის კერძო ბინაში და კომპიუტერი წაიღეს. სასამართლოს წინა სხდომაზე მოწმის სახით დაკითხულმა დაზარალებულმა გოგომ მოსამართლეს უთხრა, რომ კომპიუტერი იმავე დღეს ოპოვეს, მაგრამ წაღებული იყო სუნამო, ფული და მაჯის საათი. დაცვის მხარე ყურადღებას ამახვილებდა იმაზეც, რომ თუკი ეს ნივთები ბრალდებულებმა დაზარალებულების თანდასწრებით წაიღეს, ეს ქურდობაა და არა ძარცვა.

ბათუმის საქალაქო სასამართლომ არასაკმარისად მიიჩნია ის მტკიცებულებები, რომელიც ბრალდების მხარემ წარმოადგინა ძარცვის ნაწილში. ადვოკატ მამუკა ზოიძის შეფასებით, სწორედ ამის გამო შეცვალა მოსამართლემ კვალიფიკაცია და ძარცვის ნაცვლად კერძო საკუთრების ხელყოფის მუხლით გამამტყუნებელი განაჩენი გამოიტანა. საქმეში წარმოდგენილი იყო ვიდეო სათვალთვალო კამერის ჩანაწერი, რომელიც დაზარალებულების ბინაში ბრალდებულების შესვლის ფაქტს ადასტურებდა.

ნეტგაზეთის მასალების სხვა გამოცემებში გადაბეჭდვის წესი
როინ გუნდაძე