ბათუმში, ბონი-გოროდოკის დასახლებაში, მდინარე ბარცხანაზე მდებარე ხიდი ქალაქის მერიის ინფორმაციით ავარიულია და მასზე ავტოტრანსპორტის მოძრაობა აკრძალულია. ეს ხიდი გოროდოკში ერთმანეთს მაიაკოვსკისა და სვიშევსკის ქუჩებს აკავშირებს.
„ხიდის კონსტრუქციული ნაწილის დაზიანების გამო ხიდზე სატრანსპორტო მოძრაობა დროებით შეიზღუდა. ამ ეტაპზე, ყველა შესაბამისი სამსახურის ჩართულობით, ხიდის სტრუქტურული მდგრადობის შესწავლა და აღდგენითი სამუშაოების დაგეგმვა მიმდინარეობს“ – განაცხადა ბათუმის მერიამ 17 მაისს.
მერია „ხიდის კონსტრუქციული ნაწილის დაზიანების“ მიზეზებზე არ საუბრობს, თუმცა „ბათუმელებს“ მიმდებარე დასახლებაში რამდენიმე პირმა უთხრა, რომ ხიდზე მძიმეწონიანი მანქანები გადაადგილდებოდნენ, რომლებსაც ინერტული მასალები გადაჰქონდათ ხელოვნური კუნძულის მშენებლობისთვის [ავტობანიდან ჩამოდიოდნენ და ამ ხიდის გავლით მიდიოდნენ ბარცხანაში], ამიტომ ხიდმა დატვირთვას ვერ გაუძლო.
„მიმდინარეობს წინასაპროექტო კვლევა, ხიდის კონსტრუქციული ნაწილის შესწავლა, რის შემდეგაც დაიწყება მუშაობა პროექტირებაზე“, – გვითხრეს დღეს, 21 მაისს, ბათუმის მერიის საქალაქო ინფრასტრუქტურისა და კეთილმოწყობის სამმართველოში.
სამმართველოდან გვაინტერესებდა ინფორმაცია – დაახლოებით როდის დაიწყება ხიდის სარეაბილიტაციო სამუშაოები, რა ფორმით შეისყიდიან და რა დრო დასჭირდება მის დასრულებას.
ბათუმის მერიის ინფორმაციით ხიდზე მოძრაობა მინიმუმ 3 თვით შეიზღუდა, ანუ 18 აგვისტომდე.
დაზიანების გამო გოროდოკში მდინარე ბარცხანაზე ხიდი 2025 წლის აგვისტოს ბოლომდე გადაიკეტა / 21.05.2025
დაზიანების გამო გოროდოკში მდინარე ბარცხანაზე ხიდი 2025 წლის აგვისტოს ბოლომდე გადაიკეტა / 21.05.2025
მდინარე ბარცხანა / დაზიანების გამო გოროდოკში, მდინარე ბარცხანაზე ეს ხიდი 2025 წლის აგვისტოს ბოლომდე გადაიკეტა / 21.05.2025
დაზიანების გამო გოროდოკში მდინარე ბარცხანაზე ხიდი 2025 წლის აგვისტოს ბოლომდე გადაიკეტა / 21.05.2025
გადაკეტილი ხიდის ერთ-ერთ მხარეს ხეზე მიჭედებულია დაფა, რომელიც გვამცნობს, რომ სამუშაოები აქ ბათუმის მერიის სამმართველოს დაკვეთით ხორციელდება.
„ბათუმელები“ დაუკავშირდა ამხანაგობა „ნიზუმალის“, სადაც გვითხრეს, რომ ისინი ნაპირსამაგრ სამუშაოებს ასრულებენ და ხიდთან შეხება არ აქვთ.
აღსანიშნავია, რომ ნაპირსამაგრი სამუშაოები გადაკეტილი ხიდის ქვემოთაც უნდა შესრულდეს. „ბათუმელებმა“ ამ ეტაპზე ვერ მოახერხა იმის დადგენა, ხიდზე დაგეგმილი სამუშაოები შეუშლის თუ არა ხელს ნაპირსამაგრ სამუშაოებს.
ბათუმში, თევდორე მღვდლის ქუჩის N1-დან N114-მდე სანიაღვრე სისტემის მოწყობასა და ნიჟარაძის ქუჩა N6ბ-დან ნიჟარაძის ქუჩა N26-მდე [მდინარე ბარცხანის კალაპოტში] ნაპირსამაგრი კედლის მოწყობაზე მერიის სამმართველოს ხელშეკრულება ერთობლივი საქმიანობის ამხანაგობა „ნიზუმალი“-სთან 4 385 128 ლარზე აქვს გაფორმებული.
ხელშეკრულება 2024 წლის აგვისტოშია გაფორმებული, რომლის მიხედვითაც ორთავე მისამართზე სამუშაოს შესრულების ვადად 2025 წლის 30 მაისის ჩათვლით პერიოდი განისაზღვრა.
„ბათუმელებმა“ ნახა პროექტიც, რომლის მიხედვითაც ნაპირსამაგრი სამუშაოები გადაკეტილი ხიდის ქვემოთაც უნდა ჩატარდეს – აშენდეს რკინაბეტონის კედელი მდინარის ორივე მხარეს. ამ პროექტში ხიდის ავარიულობის შესახებ არაფერი წერია. აქვე აღსანიშნავია, რომ პროექტში მდინარე ბარცხანის ნაცვლად შეცდომით მდინარე ყოროლისწყალია მითითებული, თუმცა ამას მერიის სამმართველოში, როგორც ჩანს, არავინ მიაქცია ყურადღება.
რაც შეეხება ნაპირსამაგრი სამუშაოების დასრულების ვადას, ის 2025 წლის 30 მაისის ნაცვლად სამი თვით, სექტემბრამდე გადაავადეს [30 აგვისტოს ჩათვლით].
ნაპირსამაგრი სამუშაოების გადავადების მიზეზები მხარეთა შეთანხმების დოკუმენტებიდან:
„ნიზუმალმა“ წერილობით გვაცნობა, რომ ხელშეკრულების შესაბამისად ყველა საჭირო ორგანიზაციას წერილობით აცნობა მიწის ქვეშა და მიწის ზედა კომუნიკაციებთან დაკავშირებით ქსელების მიმართულების და არსებობის დასადგენად. აღნიშნულმა გარემოებამ თავის მხრივ გარკვეული დროით შეაფერხა სამუშაოების განხორციელება.
ასევე, სამუშაო პროცესების შეჩერება გამოიწვია გრძელვადიანმა უამინდობამ. 2024 წლის ნოემბრის თვეში მოსულმა უხვმა ნალექმა ქალაქის ბევრ ლოკაციაზე, მათ შორს ნიჟარაძის ქუჩა N6ბ-დან ნიჟარაძის ქუჩა N26-მდე ნაპირსამაგრი კედლის მოწყობის სამუშაოებზე გამოიწვია მეწყრული პროცესები, მდინარის ადიდებამ მნიშვნელოვანი ზიანი მიაყენა განხორციელებულ სამუშაოებს, ჩარეცხა მოწყობილი მისასვლელი გზა, საიდანაც ხდებოდა ობიექტის მომარაგება სამშენებლო მასალებით და მძიმე სპეცტექნიკით.
კომპანიის მიერ ამოღებული ქვაბული ნაპირსამაგრი კედლის მოსაწყობად განმეორებით იქნა შევსებული ინერტული მასალით და კომპანიის მიერ ხელახლა გახდა მოსამზადებელი სამუშაოების ჩატარების საჭიროება მისასვლელი გზის მოსაწყობად.
ხელშეკრულების გაფორმების დღიდან დღემდე განვითარებულმა უამინდობამ და ნალექიანი დღეების მრავლად არსებობამ გამოიწვია ქ. ბათუმში, ნიჟარაძის ქუჩა N6ბ-დან ნიჟარაძის ქუჩა N26-მდე ნაპირსამაგრი კედლის მოწყობის სამუშაოების შეფერხება და სამშენებლო ტემპის შენელება.
აღნიშნული გარემოებიდან გამომდინარე, „ერთობლივი საქმიანობის ამხანაგობა ნიზუმალ“-მა 05.05.2025წ. კორესპონდენციით 10/1425125467-90 მოგვმართა ზემოაღნიშნულ მისამართზე სამუშაოების შესრულების ვადის გაგრძელებასთან დაკავშირებით და წარმოადგინა სსიპ „გარემოს ეროვნული სააგენტოს“ ცნობა, რომლის საფუძველზეც დაკორექტირდა ფინანსური გეგმა-გრაფიკი.
„გარემოს ეროვნული სააგენტოს“ ცნობების გათვალისწინებით აგვისტოდან-მარტის თვის ჩათვლით ნალექიანი დღეების რაოდენობამ შეადგინა 94 დღე, გამომდინარე აქედან, მიზანშეწონილად მივიჩნევთ ნაპირსამაგრი კედლის მოწყობის ხელშეკრულებით განსაზღვრული სამუშაოების შესრულების ვადა გაგრძელდეს 2025 წლის 30 აგვისტოს ჩათვლით.“
„ნიზუმალისთვის“, შესყიდვების პორტალის 2025 წლის 21 მაისის მონაცემებით, ხელშეკრულების თანხის [4 385 128 ლარის] მხოლოდ 16 პროცენტია გადარიცხული – ჯამში 704 ათას 152 ლარი.
მდინარე ბარცხანა – კალაპოტი გადაკეტილ ხიდამდე, სადაც ნაპირსამაგრი სამუშაოები დაწყებულია [მარცხნივ] და ამავე მდინარის კალაპოტი ხიდის შემდეგ, სადაც ნაპირსამაგრი სამუშაოები ჯერ არ დაწყებულა [მარჯვნივ] / 21.05.2025
დაზიანების გამო გოროდოკში მდინარე ბარცხანაზე ხიდი 2025 წლის აგვისტოს ბოლომდე გადაიკეტა / 21.05.2025
ამ თემაზე:
სად შეიზღუდა მუნიციპალური ავტობუსის მოძრაობა ბათუმში ხიდის დაზიანების გამო
