Batumelebi | „მინდა წარმატებული მეცნიერი ვიყო“ „მინდა წარმატებული მეცნიერი ვიყო“ – Batumelebi
RU | GE  

„მინდა წარმატებული მეცნიერი ვიყო“

ბათუმელი სტუდენტი სან დიეგოს უნივერსიტეტში

ანა თავართქილაძე ერთ-ერთია იმ შვიდ ბათუმელს შორის, რომლებიც ეროვნული გამოცდების შედეგად წელს თბილისში, სან დიეგოს უნივერსიტეტში ისწავლიან. მისით მას შემდეგ დაინტერესდნენ, როცა საგნობრივ ოლიმპიადაში, ქიმიაში პირველი ადგილი აიღო. ამ წარმატების შემდეგ ანუ მე-12 კლასში სწავლის დროს, ანას დაუკავშირდნენ და სან დიეგოს უნივერსიტეტში ჩაბარება შესთავაზეს. აბიტურიენტებს, რომლებიც სან დიეგოს უნივერსიტეტში გადაწყვეტენ სწავლის გაგრძელებას, უნივერსიტეტი ინგლისური ენის გაუმჯობესების მიზნით, მე-12 კლასელებს უფასო კურსებს სთავაზობს. ანა შეთავაზებას  დათანხმდა – ამბობს, რომ გეგმავს ქიმია-ბიოტექნოლოგიის მიმართულებით წარმატებული მეცნიერი გახდეს.

თბილისში, სან დიეგოს სახელმწიფო უნივერსიტეტში სწავლა, ქართული რეალობიდან გამომდინარე, ერთი შეხედვით, საკმაოდ ძვირი ღირს, მაგრამ უნივერსიტეტის პოლიტიკა იძლევა იმის შესაძლებლობას, რომ მინიმალური თანხით, ფაქტობრივად, უფასოდ შეიძლება დაამთავრო ამერიკული უნივერსიტეტი საქართველოში. ასე მოხდა ბათუმელი ანა თავართქილაძის შემთხვევაშიც: ეროვნული გამოცდების გზით მან 50-პროცენტიანი გრანტი მოიპოვა, თავად უნივერსიტეტმა კი მისი სწავლება 6 500 დოლარით დააფინანსა. „შესაბამისად, ერთი სასწავლო წლის განმავლობაში ანას მხოლოდ 500 დოლარის გადახდა მოუწევს“.

„ოლიმპიადაში გამარჯვების შემდეგ, უნივერსიტეტიდან დამირეკეს და შემომთავაზეს, რომ მათი სტუდენტი გავმხდარიყავი… ასე გავხდი წელს სან დიეგოს სახელმწიფო უნივერსიტეტის ბიოქიმიის სტუდენტი, რა თქმა უნდა, ეროვნული გამოცდების ჩაბარების შემდეგ“, – იხსენებს ანა.

სასკოლო ოლიმპიადაში გამარჯვებამდე ანას სხვა გეგმები ჰქონდა. სწავლის გაგრძელებას სამედიცინო უნივერსიტეტში აპირებდა, „მაგრამ როცა უნივერსიტეტის [სან დიეგოს] პირობებსა და შემოთავაზებებს გადავხედე, გადავწყვიტე ამერიკულ უნივერსიტეტში ჩამებარებინა“, – გვიყვება ანა.

ანას აზრით, შემოთავაზება მიმზიდველი იყო, რადგან ამ უნივერსიტეტში საქართველოდან გაუსვლელად შეგიძლია მიიღო ამერიკული განათლება და დიპლომი:

„გარდა იმისა, რომ ხარისხიან განათლებას მივიღებ და კონკურენტუნარიანი ვიქნები, მექნება ორი დიპლომი, როგორც ქართული, ასევე ამერიკული. ბიოქიმია ერთ-ერთი ყველაზე პერსპექტიული სპეციალობაა, თანაც ამ მიმართულებით სპეციალისტები ნაკლებია ჩვენს ქვეყანაში და მოთხოვნადი პროფესიაა.“

ანა თავართქილაძე მე-11 კლასამდე ბათუმის მე-5 საჯარო სკოლაში სწავლობდა, შემდეგ კი მე-4 სკოლაში გადავიდა სასწავლებლად. ანა გვეუბნება, რომ ქიმიას სკოლაში კარგად სწავლობდა. „კარგი მასწავლებელი მყავდა. მიუხედავად იმისა, რომ საჯარო სკოლებში არ არის იმის ტექნიკური შესაძლებლობა, რომ ცდები ჩაატარო და ხშირი შეხება გქონდეს პრაქტიკასთან, ჩემი მასწავლებელი – ლია კუპრაძე მაინც ახერხებდა, რომ კარგად ესწავლებინა. რეპეტიტორთანაც დავდიოდიორი ორი წელი.“

„ბათუმელების“ კითხვაზე, შეძლებდა თუ ვერა რეპეტიტორის დახმარების გარეშე წარმატების მიღწევას? ანა გვეუბნება, რომ დამატებითი მეცადინეობა მაინც საჭიროა. მისი აზრით, სკოლებში უნდა გაუმჯობესდეს ქიმიის სწავლება, რადგან მოსწავლეების უმეტესობა ამ საგანს რთულად იმიტომ მიიჩნევს, რომ სათანადოდ არ ისწავლება.

„რეალურად, არც თუ ისე რთული საგანია. თუ კარგად და ნათლად ასწავლიან, დარწმუნებული ვარ, უფრო მეტი ბავშვი გაყვება ამ სპეციალობას. უფრო საინტერესო უნდა გახდეს გაკვეთილები. სკოლებში კი არის ლაბორატორიები, მაგრამ ხშირად არ გვქონდა ქიმიური მასალები, გაკვეთილები ცდების დახმარებით რომ ჩაგვეტარებინა“.

ანას თქმით, ასეთ შემთხვევაში კარგია ონლაინრესურსების გამოყენება: „ექსპერიმენტებს ვუყურებდი ინგლისურენოვან საიტებზე, უცხო ენაზე კარგი რესურსებია, ქართულად – ნაკლები. ონლაინექსპერიმენტები კარგად არის გაკეთებული და სწავლის სტიმულს გაძლევს“.

კითხვაზე, როგორ ფიქრობთ, რა არის საჭირო განათლების სტიმულირებისთვის, რა უნდა გააკეთოს სახელმწიფომ? – ანას მოსაზრებაა, რომ ყველაფრის საფუძველი სკოლაშია და თუ გაკვეთილები საინტერესო იქნება, შემდეგ მოსწავლეები თვითონ გაიკვლევენ გზას. „პედაგოგს ძალიან დიდი მნიშვნელობა აქვს, მეც იმიტომ ვისწავლე კარგად, რომ პედაგოგი მყავდა კარგი“.

ანას სამეცნიერო მუშაობა აინტერესებს და ფიქრობს, რომ ეს სფერო საქართველოში დროთა განმავლობაში განვითარდება: „სან დიეგოს უნივერსიტეტში სტუდენტების 43 პროცენტი გოგონაა. ქალები მეცნიერებაშიც ცოტანი ვართ და ამ მხრივაც საინტერესოა. მინდა, რომ ბევრი ქალი ხედავდეს თავის ადგილს მეცნიერებაში.“

ანა ამბობს, რომ ერთი წელი შეიძლება აშშ-შიც ისწავლოს.

სან დიეგოს სახელმწიფო უნივერსიტეტი საქართველოში მეორე წელია ფუნქციონირებს. ასევე ორი წელია ფუნქციონირებს ინგლისური ენის აკადემია, რომელიც იმ მეთორმეტეკლასელებს, რომლებიც კარგად სწავლობენ საბუნებისმეტყველო საგნებს, ასევე მათემატიკას და გადაწყვეტილი აქვთ ჩააბარონ, ვთქვათ, სან დიეგოს უნივერსიტეტში ელექტრონული ან თუნდაც კომპიუტერული ინჟინერიის მიმართულებით, ინგლისური ენის უნარების გაუმჯობესებაში უფასოდ ეხმარება. მსგავსი სასწავლო ცენტრი მოქმედებს როგორც თბილისში, ისე რეგიონებში. ბათუმში ეს ცენტრი რუსთაველის უნივერსიტეტის შენობაშია განთავსებული.

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com