„გიდასტურებთ, რომ სპეციალური საგამოძიებო სამსახური შეუერთდება საქართველოს გენერალურ პროკურატურას,“ – მოგვწერეს სპეციალური საგამოძიებო სამსახურის პრესცენტრიდან.
სხვა დეტალებზე ჯერჯერობით უწყებაში არ საუბრობენ. აქ აღნიშნეს, რომ პარლამენტში ამ კუთხით საკანონმდებლო ინიციატივა შევა.
„საზოგადოებისთვის დამატებითი დეტალები მას შემდეგ გახდება ცნობილი, რაც საქართველოს პარლამენტში, ბიუროს წარედგინება საკანონმდებლო ინიციატივა, რომელშიც დეტალურად იქნება განმარტებული ცვლილებების საჭიროება და ფორმები,“ – მოგვწერეს სპეციალური საგამოძიებო სამსახურის პრესცენტრიდან.
ეს უწყება სამართალდამცველების მიერ ჩადენილ სავარაუდო დანაშაულებს, ასევე ჟურნალისტების პროფესიული საქმიანობის წინააღმდეგ ჩადენილ დანაშაულებს იძიებდა. ეს უწყება ევროინტეგრაციის პროცესში ერთ-ერთი რეკომენდაციის შემდეგ შეიქმნა იმისთვის, რომ პროკურატურის ინტერესის და გავლენის მიღმა, ობიექტური და მიუკერძოებელი გამოძიება ჩატარებულიყო.
„საქართველოსა და ევროკავშირს შორის ასოცირების 2017-2020 წლების დღის წესრიგის“ თანახმად, ქვეყანამ აიღო ვალდებულება საერთაშორისო ვალდებულებების სათანადოდ შესრულების გზით, არასათანადო მოპყრობასთან ბრძოლის მიზნით ეფექტიანი რეფორმები განახორციელოს. სწორედ აღნიშნულის საფუძველზე 2019 წლის 1-ელ ნოემბერს სახელმწიფო ინსპექტორის საგამოძიებო სამსახური შეიქმნა, ხოლო 2022 წლის 1-ელ მარტს კი დამოუკიდებელი ორგანო – სპეციალური საგამოძიებო სამსახური ამოქმედდა.
სპეციალური საგამოძიებო სამსახური დამოუკიდებელი საგამოძიებო ორგანოა, რომლის მთავარი მისია მოხელის მიერ ჩადენილი ძალადობრივი დანაშაულების და არასათანადო მოპყრობის ფაქტების ეფექტური, დროული და დამოუკიდებელი გამოძიებაა,“ – აღნიშნულია სპეციალური საგამოძიებო სამსახურის ოფიციალურ ინტერნეტგვერდზე.
