მზია ამაღლობელი მგონი პირველი ქალია საქართველოში, ვის პატიმრობასაც კაცები ითხოვენ ამ ბრალდებით – დათო ტურაშვილი

რას ნიშნავს ქართულ კულტურაში, როცა ქალი სილას აწნის კაცს? – ამ და მზია ამაღლობელის საქმესთან დაკავშირებულ სხვა კითხვებზე საკუთარი მოსაზრების გაზიარება „ბათუმელებმა“ მწერალ დათო ტურაშვილს სთხოვა.

დათო ტურაშვილი: „არა მარტო ქართულ, არამედ სხვა ხალხის ხელოვნებასა და მითუმეტეს ლიტერატურაშიც, ძალიან ხშირად, ქალის მიერ კაცისთვის გაწნული სილა იყო და არის სასოწარკვეთილი პასუხი კაცების მხრიდან ძალადობასა და შეურაცხყოფაზე.

რასაკვირველია, მზია ამაღლობელიც არის ხელისუფლების სამიზნე სამაგალითო დასჯისთვის და სრულიად დარწმუნებული ვარ, რომ დამოუკიდებელი სასამართლოს შემთხვევაში, ყველაფერი სხვაგვარად იქნებოდა – არც დაზარალებულს და არც ბრალდების მხარეს ასეთი მოთხოვნები არ ექნებოდათ.

მზია ამაღლობელი მგონი პირველი ქალია საქართველოს ისტორიაში, ვის პატიმრობასაც კაცები ითხოვენ ამ ბრალდებით და სამწუხაროა, რომ მოსამართლეც და პროკურატურაც ამ და არა მარტო ამ შემთხვევაში, მხოლოდ ხელისუფლების კარნახით მოქმედებენ.

თავისუფლება არის აზროვნება უპირველესად და პასუხისმგებლობა და საბჭოთა რეჟიმმა ყველაზე მწარე მემკვიდრეობად სწორედ არაპროფესიონალიზმი დაგვიტოვა. პროფესიონალი კი არის სწორედ ის, ვისაც ხელისუფლება ვერ აიძულებს, რომელიმე მმართველი პარტიის სასარგებლოდ მიიღოს რომელიმე გადაწყვეტილება. ამიტომაც მოგვადგა ისევ რუსეთის იმპერია – დამოუკიდებლობა აღვადგინეთ, მაგრამ თავისუფლება ჯერ ვერ დავიბრუნეთ და ამით სარგებლობს კიდეც საქართველოს მთავარი მტერი.

რაც ჩვენ ქალების, სიყვარულისა და სიკეთის სადღეგრძელო გვაქვს დალეული, სულ ტყუილი ყოფილა?!“

ამავე თემაზე: 

სილა რეჟიმს, რომელიც გვგუდავს – ზვიად რატიანი მზია ამაღლობელზე